De Guindos explicará a Alemaña a axenda reformista desde Galicia 

Ata tres membros do Goberno de Mariano Rajoy participarán o vindeiro luns en Santiago de Compostela nunhas xornadas sobre Europa que contarán coa presenza do titular alemán de Finanzas, Wolfgang Schaüble, así como outros cargos alemáns. Os representantes do Executivo central expoñeranlles a chamada "axenda reformista".

Schaüble aproveitará a visita a Compostela para manter un encontro bilateral co ministro español de Economía, Luís de Guindos, segundo confirmaron fontes diplomáticas.

Tamén estarán Santamaría e Margallo

Xunto a De Guindos, desprazaranse a Santiago de Compostela a vicepresidente do Goberno, Soraya Sáenz de Santamaría, e o xefe da diplomacia española, José Manuel García-Margallo. Participarán nun seminario organizado entre o domingo e o martes pola Fundación Konrad Adenauer, vinculada aos democristianos alemáns da CDU e coa que históricamente colabora o PP.

Schäuble intervirá xunto a De Guindos nunha mesa de debate pola tarde sobre a relación entre Europa e os seus países membros, centrada nos criterios e mecanismos para desenvolver unha cooperación económica e fiscal.

Xunto antes deste debate, Saénz de Santamaría abrirá outra mesa sobre 'A axenda española de reformas e o seu impacto na UE'. Os ministros españois subliñarán nas súas intervencións que a axenda de reformas do Executivo de Rajoy non ten marcha atrás "porque non hai outra alternativa e porque a gran maioría da poboación apoia ao Goberno", segundo aseveraron fontes diplomáticas.

Xornadas pechadas pero con prensa estranxeira

Aínda que as xornadas non son abertas á prensa, invitouse a representantes de medios de comunicación como o Financial Times ou o Frankfurter Allgemeine Zeitung para moderar algunhas das mesas.