Rajoy acelera 'as medidas dolorosas': inminente rebaixa salarial a funcionarios e pensións conxeladas

O presidente do Goberno lanzou o globo sonda na casa dos empresarios. Ante o presidente da CEOE, Juan Rosell, e toda a xunta directiva da patronal, Mariano Rajoy advertiu que tomará "medidas dolorosas nos próximos meses". Pero o horizonte temporal será menor e as medidas dolorosas afectarán a dous grandes colectivos: funcionarios e pensionistas.

O poder adquisitivo de ambos grupos verase fortemente afectado xa que o Executivo planea recortar soldos públicos (-10% de media) e conxelar as pensións. Ambas decisións comunicaranse antes de agosto.

A nova fase de recortes incluirá a subida do IVE, que suporá a práctica desaparición do tramo superreducido (produtos gravados co 4%) e a intensificación da loita contra a fraude. Estúdase, a petición de Bruxelas, subir o IVE xeral ao 20%.

A execución orzamentaria do que levamos de ano acendeu as alarmas en Moncloa. O Estado xa esgotou a súa marxe do 3,5% e non hai trazas de que o resto de administracións sexa capaz de axustarse ao obxectivo anual: o 5,3% do PIB. Por iso, segundo fontes consultadas por este diario, o Goberno central baralla a posibilidade de estender os recortes salariais a comunidades autónomas, concellos e outros organismos.

En todas as administracións

Aínda resta pendente definir como xeralizar a decisión ao conxunto das administracións e que acontecerá con aqueles empregados públicos que traballan para entidades que se avanzaron e xa recortaron salarios, como é o caso de Catalunya.

O secretario de Estado de Administracións Públicas, Antonio Beteta, non descarta este macro recorte. "No momento en que o Goberno tome as súas decisións, será informado quen teña que ser informado, ben sexa no ámbito das comunidades, si é materia da súa competencia, no ámbito dos sindicatos en materia da función pública. Onde sexa, segundo a decisión que no seu día e no seu caso tome o Goberno, que aínda non tomou ningunha", aclara.

Os ingresos despéñanse

O ministro de Facenda, Cristobal Montoro, non é capaz de cadrar as contas coas ferramentas actuais. Aínda que oficialmente o Goberno o atribúa ás transferencias a autonomías, o feito de que xa absorba a súa marxe de déficit anual radica nunha caída fortísima dos ingresos.

A crise está pasando unha factura maior á calculada ao Estado. Coa análise dos ingresos dos últimos meses pódese comprobar como, pese á subida de sete puntos de media do IRPF (o imposto sobre nóminas), a recadación por este concepto só subiu o 0,8%. Mentres, Facenda ingresou por IVE un 10% menos. Ambos impostos supoñen o 80% da recadación.

Ademais o Goberno, aínda que fará a vista gorda cos miles de casos detectados tras cruzar a base de datos de Facenda coa Seguridade Social e que se beneficiaron de medicamentos gratuitos ilexítimamente, valora impoñer sancións en futuros casos. Traballo e Facenda están intercambiando datos para aflorar o cobro irregular da prestación por desemprego.