Grupo Nores, armadora do ‘Villa de Pitanxo’, dispara beneficios ata os sete millóns dous anos despois do naufraxio

O grupo Pesquerías Nores Marín, a armadora do ‘Villa de Pitanxo’, o buque que naufragou o 15 de febreiro de 2022 a 250 millas de San Juan de Terranova (Canadá) no que perderon a vida 21 das 24 persoas que traballaban a bordo, pechou o 2024 con uns beneficios de 7,18 millóns, por enriba dos 2,48 conseguidos o ano anterior e dos 4,1 do 2023.

Segundo os datos depositados ante o Rexistro Mercantil e consultados por Economía Digital Galicia, a compañía con sede en Marín incrementou a súa facturación un 24%, pasando dos 39,92 millóns en 2023 aos 49,64 en 2024.

En canto ao resultado de explotación, o propio da actividade da compañía, alcanzou o pasado exercicio os 9,2 millóns fronte aos 2,6 do 2023. Pola súa parte, o patrimonio neto de Pesquerías Nores ascendeu o ano pasado a 46,54 millóns, 6,7 por enriba do rexistrado en 2023.

“Durante o exercicio 2024, o Grupo continuou posicionándose nos clientes actuais, reforzando a súa presenza, e incrementando as súas relacións con clientes novos a nivel nacional e internacional a través da comercializadora do grupo”, detalla a pesqueira na memoria que acompaña ás contas, auditadas por Galicontrol.

O grupo Pesquerías Nores Marín constituíuse en maio de 2008. Dentro da súa estrutura consolidada, á marxe da súa cabeceira –Pesquerías Nores Marín, que é a que aporta a maior parte do negocio– forman parte da compañía as filiais Nores Marín Comercial SL, Pesquerías Manuel Nores Canarias SL e Nores Marine Limited, que se atopa en fase de liquidación, segundo se detalla nas contas.

A traxedia do ‘Pitanxo’

O pasado febreiro o Xulgado Central de Instrución número 2 da Audiencia Nacional acordou unha nova prórroga de seis meses, ata principios do mes de setembro, do prazo de instrución para concluir a investigación en relación ao naufraxio do Villa de Pitanxo ao que só sobreviviron o seu capitán, Juan Padín; o seu sobriño, Eduardo Rial, e o mariñeiro, Samuel Kwesi.

Tres meses despois desta prórroga a Comisión de Investigación de Accidentes e Incidentes Marítimos (Ciaim) enviou ao xuíz Ismael Moreno –que ve indicios de 21 delitos de homicidio por imprudencia imputando a Padín polos mesmos– o seu informe de conclusións, aínda en fase inicial de borrador, sobre as razóns do accidente.

Entre outros aspectos o informe detalla que “non se tomaron medidas precautorias ante a posibilidade de ter que realizar unha virada en condicións meteorolóxicas moi adversas”. Ademais de iso sinalábase que cando se ordenou o abandono do buque, “non había tempo material para un abandono ordenado”. “O tardío da orde de abandono tamén foi causa de que non se puidesen despregar e arriar correctamente as balsas salvavidas, o que causou o desgarramento do fondo da balsa, facendo que se inundase”.