Un de cada tres galegos respira máis aire contaminado do permitido

Ecoloxistas en Acción denuncia que un total de 850.000 galegos estiveron expostos durante 2024 a unha contaminación que excede os novos límites aprobados para 2030 pola Unión Europea.

Así o revela a entidade no seu último informe sobre calidade do aire. No estudo precísase que as áreas urbanas de A Coruña e Vigo incumpriron o novo límite legal anual do dióxido de nitróxeno. A maioría das cidades galegas non implantaron as obrigadas zonas de baixas emisións, e a aprobada en A Coruña “non é eficaz”, advirte o grupo ecoloxista.

Ademais, se se teñen en conta os valores recomendados pola Organización Mundial da Saúde, “moito máis estritos” que os límites legais vixentes e novos, Ecoloxistas en Acción lamenta que o aire contaminado “volveu a afectar en 2024 á totalidade da poboación galega”.

En este sentido, o documento elaborado pola organización ecoloxista analiza os datos recollidos en 61 estacións oficiais de medición instaladas en Galicia. Entre as súas principais conclusións, sinala que durante 2024 a calidade do aire mellorou con respecto a 2023 e os anos anteriores á pandemia, cunha redución “significativa” dos niveis de partículas en suspensión, dióxido de nitróxeno e ozono troposférico, en porcentaxes que oscilan entre o 14% e o 83% con respecto ás medias do período 2012-2019.

Ecoloxistas en Acción toma como referencia os novos valores límite da Directiva europea 2024/2881, de 23 de outubro de 2024, que deberán ser tidos en conta antes de 2030. De acordo a estes límites, o aire contaminado afectou en 2024 a unha terceira parte da poboación galega. Para o colectivo, iso “expresa a magnitude do reto a asumir polas administracións nos próximos anos para aliñarse coa nova lexislación”.

900 mortes en Galicia pola mala calidade do aire

Considerando a normativa aínda vixente, “non houbo poboación que respirase aire contaminado nin superficie exposta a niveis de contaminación que danan a vexetación”. Ademais, o informe indica que por “a forte caída do ozono”, o territorio galego estivo “libre de niveis de contaminación prexudiciais para a vexetación”. As partículas presentaron a peor situación na cidade de Ourense. E a fábrica de cemento de Oural (Lugo) elevou o dióxido de xofre no seu entorno.

“A contaminación do aire debería abordarse como un problema sanitario de primeiro orde. Segundo a Agencia Europea de Medio Ambiente, en 2022 faleceron ata 30.000 persoas no Estado español pola mala calidade do aire, 900 delas en Galicia”, alerta Ecoloxistas en Acción.