O ex-conselheiro Alfonso Villares anuncia que quer voltar ao PP e exige desculpas a quem o apontou

O exconselleiro Alfonso Villares manifestou que quer recuperar “a normalidade” na súa “vida privada e profesional”, e deixar atrás “unha etapa de dano irreparable”. O que fora titular do departamento do Mar anunciou que o arquivo do seu caso de suposta agresión sexual non foi recurrido pola acusación, polo que é “firme”. Ante iso indicou que un dos primeiros pasos que dará será pedir o “reingreso” no PPdeG e esixiu “unha desculpa” a quen “non respectaron” a súa presunción de inocencia.

“Dedicarme-ei a traballar para restituír a miña imaxe e o meu honor”, sentenciou Alfonso Villares (Cervo, 1970), que, tras dimitir no seu día do seu cargo á fronte do departamento autonómico do Mar, volveu ao seu posto de traballo como veterinario ligado á Consellería do Medio Rural na oficina de Viveiro.

Comparecencia sen preguntas

Este xoves compareceu para facer unha declaración convocada sen preguntas, a pesar do intento dos xornalistas que, ao remate da súa intervención, lle preguntaron se tiña algunha oferta concreta do presidente da Xunta, Alfonso Rueda, para volver á vida pública. El limitouse a pedir “respecto”, despois de concluír a súa comparecencia felicitando á súa nai polo seu 93 aniversario e instando ao seu fillo, presente, a felicitar á avoa se aínda non o fixera.

A Audiencia Provincial da Coruña confirmou a semana pasada o arquivo por “falta de indicios” da denuncia por agresión sexual contra Villares. Ratificaba así o auto ditado en decembro polo Xulgado de Instrución número 2 de Ferrol, que determinou que non había lugar ao procesamento do exconselleiro do Mar como autor dun delito de agresión sexual e deu por concluído o sumario.

Villares presentou a súa dimisión á fronte do departamento autonómico do Mar nunha comparecencia urxente convocada en San Caetano, a sede central do Goberno galego, en xuño do pasado ano. Afirmou entón que dimitía para poder “defenderse” en mellores condicións ante unha acusación da que se declarou “totalmente inocente”.

Arroupado por Alfonso Rueda

Ao día seguinte á súa dimisión, no que Marta Villaverde tomou posesión como nova conselleira do Mar, Villares foi arroupado no acto por todo o Goberno galego co seu presidente, Alfonso Rueda, á fronte, con quen se abrazou –-a súa amizade era pública, máis alá da súa relación política–. Alí, o titular do Executivo autonómico desexou que “se faga xustiza canto antes” con Villares para “poder recuperalo para a vida pública”.

Ese mesmo 5 de xuño, Rueda revelou que coñecía desde febreiro a denuncia contra Villares. “No mes de febreiro, o exconselleiro Alfonso Villares comunícame que recibe unha chamada na comisaría de Ferrol onde lle din que hai unha denuncia contra el e se desexa prestar voluntariamente declaración. El acode, presta esa declaración, coméntame que é por unha denuncia por uns feitos que aconteceran un par de meses antes”, relatou entón en declaracións aos medios.

A dimisión de Villares produciuse en xuño tras a notificación sobre a súa investigación xudicial por unha suposta agresión sexual por parte do Tribunal Superior de Xustiza de Galiza (TSXG).

“Investigación concluída e arquivada”

Nun hotel situado a poucos metros da sede autonómica do PPdeG, Villares comezou a súa intervención trasladando aos numerosos medios presentes na rolda de prensa que o auto da Audiencia Provincial non foi finalmente recurrido pola acusación. “É firme, a investigación está concluída e arquivada”, sentenciou.

Fixoo antes de proceder ao seu relato do “que pasou neste tempo”, remontándose ao 4 de xuño do ano pasado, cando o Tribunal Superior de Xustiza de Galiza (TSXG) lle notificou que sería investigado por suposta agresión sexual.

“Ao recibir a notificación presentei a miña dimisión como conselleiro para defenderme sen aforamento, como calquera outro cidadán, sen privilexio, e para preservar o bo nome do Goberno da Xunta. Aqueles días dixen insistentemente que era absolutamente inocente do que se me acusaba”, rememorou.

Ao tempo, lembrou que o 15 de setembro do ano pasado compareceu ante a xuíza de Ferrol que levaba o caso. “Respondi a todas as preguntas que me formularon a xuíza, o fiscal e a letrada da acusación. Non deixei nin unha soa sen contestar”, enfatizou.

E engadiu que o auto da xuíza, “refrendado polo Ministerio Fiscal”, ratificou que non había lugar ao seu procesamento. “Foi recorrido e o recurso desestimado polo mesmo xulgado (de Ferrol)”, engadiu, antes de relatar que o sumario derivouse entón á Audiencia Provincial, onde “un maxistrado e dúas maxistradas estudaron o caso” e chegaron á mesma conclusión que o xulgado inicial.

“O Ministerio Fiscal tamén apoia a decisión dese auto. Dous xulgados distintos, unha xuíza, tres maxistrados e o propio Ministerio Fiscal din o mesmo que eu o 4 de xuño: que a acusación carecía de calquera tipo de fundamento e que non había base para procesarme”, reivindicou.

“Etapa de dano irreparable”

Tras formular este relato, Villares pasou ao capítulo de agradecementos: citou á súa familia, amigos, aos seus compañeiros de traballo en Medio Rural e, en termos xerais, á xente que o “quere” e que estivo ao seu lado nestes meses que, recoñeceu, supuxeron para el un dano “profundo”.

Ao tempo, manifestou o seu desexo de “deixar atrás” unha “etapa de dano irreparable” e traballar para “recuperar a normalidade” da súa “vida privada e profesional”. Reiterando “o seu compromiso coa verdade e a transparencia”, anunciou que pedirá o seu reingreso como afiliado do PP galego, que dirixe Alfonso Rueda.

“Era afiliado desde o ano 1995 ata xuño, cando pedín a baixa voluntaria”, explicou e tamén pediu desculpas aos medios de comunicación cos que non falou nestes meses. Indicou que foron “moitas” as chamadas de xornalistas recibidas sen que respondese a “ningunha”. “Sei que me entendedes”, dixo.

Reclama desculpas ao BNG e PSdeG

Tras afirmar que, tras a resolución da Xustiza, a súa intención é continuar “preservando o seu dereito á intimidade”, queixouse de que a súa imaxe pública “foi inxustamente danada” e reprochou que houbo “persoas” —en alusión aos “responsables políticos” do BNG e PSdeG, aínda que non os citou expresamente— que decidiron “ignorar” o seu dereito á presunción de inocencia.

“Que non é un privilexio, é un dereito fundamental de calquera cidadán en calquera Estado de Dereito”, sentenciou, antes de advertir: “que haxa cargos públicos que actúen con esta irresponsabilidade entraña un enorme perigo”.

“Cando a política se dedica a condenar sen xuízo québranse as garantías de toda a sociedade e, ante esta falta de respecto aos nosos principios democráticos máis básicos, eu o que espero é unha reflexión e unha desculpa”, demandou.

“Dedicarme-ei a traballar para restituír a miña imaxe e honor. Non só por min e a miña familia, senón polos galegos aos que representei durante dous anos como conselleiro, aos meus veciños de Cervo aos que servín 16 anos como alcalde, e ás persoas que me abriron as portas da súa casa no meu labor privado como veterinario durante 11 anos. Todos saben que son incapaz de cometer os graves feitos dos que fun acusado”, engadiu.

E antes de felicitar o aniversario á súa nai e dar por pechada a comparecencia, apelou a poñerse na súa “pel”. “Se o fan, verán que o dano causado foi un dano profundo. Todos temos dereito a defender o noso bo nome cando foi cuestionado de forma tan inxusta”, rematou.