O eclipse dispara a ocupación hoteleira de Galicia ata case o 80% en agosto

Os hoteis galegos celebran o eclipse cun novo impulso ás súas cifras de ocupación. Os datos que o Clúster de Turismo de Galicia facilitou á axencia Europa Press revelan que os establecementos da comunidade pecharon o mes de agosto cun 78,1% das súas prazas ocupadas.

Trátase de tres puntos porcentuais máis que no mesmo mes de 2025 e apuntalan a tendencia ao alza que se viña rexistrando desde principios da época estival. Os turistas continúan decantándose, na súa maioría, polas zonas de costa, onde a ocupación foi do 85%. De feito, destacan que, salvo algún día puntual, non se baixou do 70% de media no litoral. No interior, os datos son algo máis baixos, cunha ocupación media do 62%.

Ademais, os hoteis galegos tamén viron mellorada a estadía media, que xa supera as cinco noites, e o prezo medio por noite, que xa é de 120 euros -incrementándose respecto a 2025-.

En canto ás reservas, case a metade (un 47,80%) fánse con unha antelación dun mes, aínda que comezan a gañar peso as reservas de última hora -nos últimos 10 días-, que supoñen xa máis dun terzo do total. O gran protagonista do mes de agosto, a nivel turístico, foi o eclipse solar que se puido ver en varios puntos da xeografía galega o 12 de agosto.

Ese día, informa o Clúster, rexistrouse a máxima ocupación do mes, dun 88% e cun prezo medio por noite de 144 euros. Na costa, este porcentaxe chegou ao 93%.