Rueda ofrece axuda da Xunta tras o accidente de Toledo e Pontón pide “evitar outro Angrois”

Alfonso Rueda sinalou que é necesario que se poñan “todos os medios” para investigar “de verdade” as causas do accidente ocorrido na mañá do mércores en Urda, na provincia de Toledo, no que polo menos 69 persoas perderon a vida.

O presidente da Xunta trasladou ao presidente de Castilla La Mancha, Emiliano García Page, ademais de toda a solidariedade do pobo galego, “todos os medios” dos que dispón o Executivo autonómico, como o Grupo psicolóxico de intervención en emerxencias (GIPCE) “moi experimentado por desgracia en catástrofes” e os forenses do Instituto Galego de Medicina Legal (Imelga) por se son necesarios.

“Son magníficos profesionais que estarían dispostos a desprazarse e a axudar sen ningún tipo de dúbida”, sostivo nunha intervención na que explicou que, por agora, non se desprazou ningún destes profesionais pero que “están á espera de ser activados e, se fosen necesarios, ir de inmediato”.

Rueda atendeu aos medios este xoves tras participar no minuto de silencio que unhas 200 persoas, entre elas os integrantes do Executivo galego, secundaron ante a sede da Xunta en Santiago de Compostela.

Na súa intervención, o máximo mandatario autonómico mostrou o seu recordo e respecto a todas as vítimas e aos seus familiares. “É o primeiro, mandar o pésame e solidariedade de todo o pobo galego”, dixo para trasladar despois o ánimo ás forzas e corpos de seguridade, aos servizos de emerxencia e ao persoal sanitario que loita por salvar vidas e curar aos feridos.

“Galicia, por desgracia, sempre que se produce un accidente ferroviario e producironse dous en moi pouco tempo, lembra o accidente de Angrois e lembra todo o que pasamos”, afirmou en referencia ao sinistro ocorrido o 24 de xullo de 2013 en Santiago de Compostela, no que morreron 80 persoas.

Tras iso, o presidente galego subliñou a necesidade de investigar as causas para que este tipo de accidentes non se deberían producir. “O momento agora mesmo, a penas 24 horas despois do accidente, é estar coas vítimas, coas súas familias e dar todo o ánimo e ofrecementos aos servizos de emerxencia. Isto é o que hai que facer agora mesmo e, despois, chegará o momento de investigar cales foron as causas para que isto non se repita ningunha máis e tamén chegará o momento de depurar responsabilidades.

Neste punto e preguntado polas palabras do ministro de Transportes, Óscar Puente, incidiu en que “non é o momento de xulgalas” e que o que debe facer é “poñer canto antes todos os medios para que se investigue de verdade o que pasou”. “Saber as causas para dar seguridade á xente que viaxa en tren e que isto é moi difícil que se volva repetir”, insistiu.

Tamén cuestionado pola comparecencia do líder do PP, Alberto Núñez Feijóo, explicou que non tivo oportunidade de falar con el onte pero que viu a súa comparecencia e que “dixo exactamente o que se espera que diga un político serio e responsable”. “Estar coas vítimas, manifestarse con serenidade e creo que neste momento, non sei se outros aproveitarían para intentar sacar algún tipo de rédito electoral, el non o fixo”, argumentou.

Ademais, puxo en valor a decisión do Partido Popular de suspender todos os actos de campaña e mesmo a propia axenda da Xunta en Galicia. “Os símbolos neste momento son tamén importantes e é unha mostra de respecto e creo que é o que temos que facer”, sostivo.

 “Investigación, rigorosa e ata o final”

A portavoz nacional do BNG, Ana Pontón, reclamou unha “investigación, rigorosa e ata o final” que determine as causas do accidente ferroviario de Urda (Toledo) e que a mesma “non se peche en falso”, como, ao seu parecer, si sucedeu no caso de Angrois, en Santiago, onde un tren descarrilou en 2013 provocando 80 falecidos.

“Isto non vai dun ministro nin dun goberno, isto vai de garantir infraestruturas seguras e que accidentes desta magnitude non volvan repetirse”, afirmou a líder nacionalista nunha rolda de prensa celebrada este xoves, na que pediu esclarecer responsabilidades “caia quen caia” e adoptar “todas, todas” as medidas necesarias para evitar máis accidentes deste calibre.

Considera que esta é “a mellor maneira de honrar ás vítimas”, ás que trasladou todo o seu apoio e afecto, ao igual que ás súas familias e amizades. Tamén enaltecou o traballo dos servizos de emerxencias e o persoal sanitario, que cualificou de “exemplar e extraordinario”.

Do mesmo xeito, apreciou a “solidariedade” da cidadanía, que, nas súas palabras, é a “mesma” que se viu en Angrois. Deste outro accidente, Pontón extraeu como ensinanza que é “imprescindible e mesmo un imperativo moral” outorgar ás vítimas e á súa familia “xustiza, verdade e reparación”.

“Dicimos con tristeza que con Angrois esta débeda nunca se saldou porque nin o goberno do Partido Popular primeiro nin o goberno do Partido Socialista despois permitiron que se saldase”, lamentou. Ao fío, dirixiuse ao actual líder do PP, Alberto Núñez Feijóo, que, nas súas palabras, “como presidente da Xunta fixo todo o que estivo na súa man para impedilo”.

Pontón lembrou que o PPdeG, cando Feijóo estaba á fronte do Goberno galego, votou ata catro veces en contra de crear unha comisión de investigación no Parlamento. Por este motivo, reprochoulle ao líder popular que dixese o mércores que “España merece saber”: “Galicia tamén merecía saber e Feijóo fixo todo o posible por evitalo”.

Deste xeito, demandou que co accidente de Toledo “non se cometan os mesmos erros” que houbo con Angrois. Entre eles, pediu evitar un “peche en falso” da investigación: “Sería facerlles pasar ás vítimas do accidente de Toledo o calvario que tiveron que pasar as familias do accidente de Angrois hai 13 anos”.

“Pedimos que se investigue ata as últimas consecuencias con rigor e con independencia cales foron as causas do sinistro e que se tomen todas, todas as medidas necesarias para que nunca máis volvamos ver unha traxedia desta dimensión e garantir a seguridade cando circulamos por un tren ao longo e ancho do Estado español”, esixiu.

Chamamento á unidade

O secretario xeral do PSdeG, José Ramón Gómez Besteiro, trasladou este xoves en Lugo de novo a solidariedade coas vítimas do accidente ferroviario ocorrido en Toledo e coas súas familias, e fixo un chamamento á unidade e ao acompañamento das persoas afectadas tamén nos próximos días.

Besteiro realizou estas declaracións antes de gardar un minuto de silencio ante a sede da Subdelegación do Goberno en Lugo en memoria das vítimas da traxedia.

En nome do socialismo galego, expresou o seu “pesar” polo sucedido e enviou unha mensaxe de apoio ás familias das persoas falecidas, aos feridos que se están a recuperar e ás persoas achegadas.

O dirixente socialista subliñou que neste momento a prioridade debe ser estar ao lado das vítimas e das súas familias. “É un momento de máis unidade e de estar coas vítimas e coas súas familias”, afirmou, antes de insistir na importancia de manter ese compromiso máis alá das primeiras reaccións tras o accidente. “Hai que estar hoxe con elas e non abandonalas mañá”, remarcou Besteiro.

Besteiro lembrou tamén que Galicia coñece de cerca as consecuencias dunha catástrofe ferroviaria, en referencia ao accidente de Angrois, e sinalou que esa experiencia “permite comprender mellor a dor das persoas afectadas e das súas familias”.