Inditex alcanza o seu máximo histórico en bolsa a pesar de perder o trono do IBEX
A multinacional de Amancio Ortega aproveita o récord do selectivo español e a achega entre Estados Unidos e Irán para elevar a súa capitalización por encima dos 181.000 millóns.
Fotomontaxe de Óscar García Maceiras e Marta Ortega co interior do edificio da bolsa de Madrid de fondo. Fotos: Europa Press
Comentarios
Inditex pechou a sesión no IBEX por riba dos 58 euros por acción nunha xornada histórica para o selectivo español, ao superar por primeira vez a cota dos 20.000 puntos, e tamén para a multinacional de Amancio Ortega, que volve tocar máximos no parqué. A compañía galega subiu un 0,73% apoiándose na caída do prezo do petróleo e a achega entre Estados Unidos e Irán, despois de que Donald Trump suxirise unha posible reapertura inmediata de Ormuz e o fin ao conflito que estalou a finais de febreiro –polo ataque de Israel e EE UU–, algo que desde Teherán descartaron.
Coa última subida, o grupo que preside Marta Ortega acumula unha revalorización de máis do 3% en 2026 e sitúa a súa capitalización bursátil nos 181.327 euros. Curiosamente, chega aos seus máximos históricos despois de perder a súa hegemonía no IBEX, pois o Santander superouno en valor bursátil. O banco de Ana Botín pechou o día cun avance do 0,6% e unha capitalización de 185.700 millóns.
Inditex consolídase entre as dez compañías europeas máis valiosas –está no posto sete– e Amancio Ortega, propietario do 59,3% das accións, eleva a súa fortuna ata os 147.200 millóns de dólares (case 128.000 millóns de euros ao cambio), a un suspiro de Bernard Arnault (LVMH), que se mantén como o europeo máis rico, segundo Forbes.
Desde a chegada á presidencia de Inditex de Marta Ortega, en abril de 2022, e con Óscar García Maceiras como conselleiro delegado, os títulos do grupo subiron un 190%. A evolución do valor nun contexto peliagudo, de dixitalización, transición enerxética, inestabilidade xeopolítica e guerra, é excelente, pero non única. O Santander revalorizouse case un 300% no mesmo período.
Os mercados europeos, ao alza
Como Amancio Ortega e Ana Botín, os mercados europeos parecen vivir ao marxe dos temores xeopolíticos que expresan as empresas cada vez que teñen que presentar un informe de resultados. Londres subiu un 0,30%; París, un 0,52%; Milán, un 1,26%; e Fráncfort, un 0,85%. Como explica Finanzas.com, o DAX alemán colleitaba avances do 0,8% e tamén liquidaba os seus máximos históricos, o mesmo que facía o S&P500 na Bolsa de Nova York. O índice tecnolóxico Nasdaq, máis castigado nas últimas sesións, anotábase subas do 2% despois das boas previsións lanzadas por Palantir.
No mercado de renda fixa, o rendemento do bono soberano español con vencemento a 10 anos acadaba o 3,533%, tras pechar o luns no 3,591%. Deste xeito, a prima de risco fronte á débeda alemá descendiu ata os 42,7 puntos. Respecto ás divisas, o euro apreciábase un 0,10% fronte ao dólar ao peche da sesión europea, ata cruzarse a un tipo de cambio de 1,1521 dólares por euro.
