A Xunta carga contra a alcaldesa da Coruña polos alugueiros e pídelle que non siga «o programa de Sánchez»
O conselleiro de Presidencia, Diego Calvo, asegura que o último informe do Observatorio da Vivenda "reafirma o que a Xunta dicía" sobre que a declaración de mercado tensionado na Coruña non tería efecto nos prezos do alugueiro.
O conselleiro de Presidencia, Xustiza e Deporte, Diego Calvo, na roda de prensa do Consello da Xunta / Xunta
Comentarios
O conselleiro de Presidencia, Xustiza e Deportes arremete contra a alcaldesa da Coruña a conta da declaración de mercado tensionado na cidade. Diego Calvo, manifestou que o último informe do Observatorio da Vivenda “reafirma o que a Xunta dicía” ante a súa postura de que esta declaración non tería efectos nos contratos de alugueiro e nos prezos, de cara a un aumento no primeiro caso e de unha baixada no segundo.
Fronte á postura mantida pola alcaldesa herculina, Inés Rey, quen defendeu que se produciron ambas cuestións, o conselleiro, con motivo da súa presenza nun acto no Palacio de Congresos da Coruña sobre o traslado de Repsol ao porto exterior de Arteixo, insistiu en que “cúmprese o que dicíamos”.
“Que esa limitación de alugueiros ía ter consecuencias, unha limitada redución dos alugueiros dun 0,4% e redúcese a oferta de alugueiros aos cidadáns nun 60%”, sentenciou. “Cúmprese o que dicíamos, por iso lle pedimos á alcaldesa que deixe de seguir ao pé da letra o programa de Pedro Sánchez e que pense nos cidadáns”, engadiu.
