O Eixo Atlántico celebra os avances na liña de Alta Velocidade entre Vigo e Oporto

Xoán Vázquez, secretario xeral do Eixo Atlántico, celebra que se fixese público o trazado de parte da liña de Alta Velocidade entre Vigo e Oporto. “É unha excelente noticia que corrobora o que vimos afirmando e todas as xestións que vimos facendo, e aínda que é certo que se están producindo uns atrasos que nos preocupan, especialmente na entrega do estudo informativo previo do primeiro tramo, o certo é que ao anunciarse xa a licitación do segundo tramo e ao terse feito público en algún medio de comunicación o trazado da ponte, iso significa que xa as tres partes nas que se divide a liña ata Portugal están desbloqueadas”.

En concreto, Vázquez refírese á ponte de 4 quilómetros sobre o río Miño que conectará os dous países, que será de maior lonxitude de toda a península.

Segundo apunta o secretario xeral do Eixo, “Portugal leva xa tempo preparando todo, ata Braga teñen todo xa perfectamente orientado e están facendo as enxeñarías.” Segundo detalla, iso “significa que tamén entre Braga e Fronteira, e polo tanto desbloqueado todo o proceso”.

Vázquez sostén que agora o que corresponde é “monitorizar que os prazos de execución, tanto dos estudos, as enxeñarías, como cando comece a obra, non se retracen para que sexa horizonte do 2030 a 2032, no que sempre traballamos, é dicir, 2030 máis os dous anos que poidan producirse de decalaxe neste tipo de obras, pois poidan efectivamente ser reais e non máis alá do 2032 poidamos ter unha comunicación entre A Coruña e Lisboa moderna e adecuada”.

O secretario xeral espera que, dentro da parte española, “tamén poidamos dicir que esa comunicación é desde Ferrol, porque o tramo Ferrol-Coruña e Coruña-Lugo son os que van máis atrasados dentro de Galicia”.