Acciona, á caza dos grandes contratos de vivenda pública galega en plena tormenta polo ‘caso Cerdán’

Acciona é unha contratista de longa traxectoria en Galicia, con capacidade para liderar a obra pública na comunidade durante as grandes obras do AVE, ou de facerse coas adxudicacións máis suculentas da Xunta. O grupo da familia Entrecanales, sen ir máis lonxe, estaba construíndo a nova sede do Goberno galego en San Caetano cando lle sobreviño o informe da UCO sobre o caso Koldo e o golpe reputacional pola súa suposta implicación nos amaños de licitacións públicas. E alí, na capital galega, continuaban as obras cando as novas pesquisas sobre Santos Cerdán, o exsecretario de Organización do PSOE que pasou cinco meses pechado en Soto del Real, apuntaron que Acciona puido pagar mordidas a Servinabar procedentes dos contratos públicos adxudicados de maneira irregular.

Non é de estrañar que o grupo, tamén un dos principais operadores do sector eólico en Galicia, encaixase o novo revés cando está á caza de obras na comunidade. E como a principal despesa da Xunta nesta materia está centrada na vivenda social, pois Alfonso Rueda marcou como obxectivo duplicar o parque público residencial en catro anos, alí está a constructora competindo polas adxudicacións. Polo menos, polas de orzamento máis elevado.

O primeiro gran contrato de Vipugal

Un dos contratos polos que compiten os Entrecanales é a construción de 56 vivendas VPP en Valdecorvos, en Pontevedra, unha das urbanizacións planeadas para mitigar as dificultades de acceso ao aluguer das familias polo seu progresivo encarecemento. Á licitación, con un orzamento de 9,34 millóns, presentouse Acciona, que competirá con outras seis ofertas: San José, Oreco Balgón, Proyecon, Gómez Crespo, Consvial-Tapusa e XAC-Orega. Todas elas son habituais competidoras na resurrección da vivenda pública galega e, presumiblemente, participarán tamén na nova licitación que está en marcha na mesma urbanización para construír 48 vivendas por 7,6 millóns.

As promocións de Valdecorvos son os primeiros grandes contratos que licita a Sociedade Pública de Vivenda de Galicia (Vipugal), unha empresa pública creada por Alfonso Rueda para capitanear o despregue do novo parque residencial e absorber os activos de solo non industrial que controlaba ata este ano Xestur. Vipugal integrou 101 millóns en activos mediante a escisión do solo residencial de Xestur.

Con 12 millóns no peto

Estas primeiras grandes licitacións da empresa pública dan continuidade ao traballo que viña realizando o Instituto Galego de Vivenda e Solo, que se encargara de promover ata agora a construción da nova vivenda pública. Nesa etapa anterior á posta en marcha de Vipugal, Acciona fixo con dous contratos relevantes, un en Vigo e outro na Coruña. Co primeiro adxudicouse a construción de 40 vivendas no barrio coruñés de Xuxán, na parcela Z-13 do antigo parque Ofimático.

Tamén pescou a constructora en San Paio de Navia, a promoción de maior tamaño das postas en marcha en Galicia. Na urbanización de Vigo, Acciona adxudicouse un contrato de 4,5 millóns para levantar 21 vivendas. Como na anterior licitación e nas que están actualmente en marcha, a compañía presentouse en solitario e non formou UTE para optar aos contratos.