Ence suma 27 anos renovando a súa certificación no rexistro europeo de xestión ambiental EMAS.

Ence renovou un ano máis a súa adhesión ao Sistema Comunitario de Xestión e Auditoría Ambientais (EMAS) e reafirma o seu papel “como referente en sostibilidade industrial” ao manter a certificación de forma ininterrompida desde 1999.

A compañía destaca que foi a primeira empresa en Galicia en obter este rexistro europeo “renovando sucesivamente a súa presenza neste sistema”.

“Desta forma converteuse na empresa máis longeva presente neste mecanismo voluntario da Unión Europea en xestión ambiental”, asegura.

O sistema EMAS (Eco-Management and Audit Scheme) é unha ferramenta desenvolvida pola Unión Europea que recoñece ás organizacións que implantaron un sistema de xestión ambiental e adquiriron un compromiso de mellora continua, verificado mediante auditorías independentes.

A adhesión ao EMAS implica asumir requisitos máis esixentes que os establecidos pola normativa legal. Así, durante máis de dúas décadas, Ence indica que se someteu a auditorías externas “que garanten a transparencia” dos seus datos ambientais. Cada declaración publicada é validada por organismos independentes.