O Goberno avala a chegada de SAIC a Ferrol, pero abre a porta a poñer condicións

O Goberno pecha filas con SAIC Motor a pesar dos informes de Defensa e dos servizos de intelixencia nos que se alerta do risco de espionaxe por parte do grupo chinés.

O ministro para a Transformación Dixital e da Función Pública, Óscar López, defendeu a instalación dunha planta chinesa de vehículos eléctricos en Ferrol. López mostrou o seu convencemento de que se vai levar a cabo garantindo o respecto á seguridade nacional a pesar da proximidade entre o lugar onde se situaría esta fábrica e o arsenal militar de Ferrol e o estaleiro de Navantia, no que se traballa con sistemas militares estadounidenses.

O ministro negou que poida chegar a rexeitarse esta inversión -que require a aprobación do Consello de Ministros– por motivos de seguridade e di que se están a analizar todas as “implicacións” que conleva e tomarán “as decisións oportunas”. Nese sentido sinala que calquera investimento de calado leva aparellados este tipo de informes e “pódense establecer unha serie de condicións para facela viable”, aínda que quixo lanzar unha mensaxe de “tranquilidade”.

“Estas inversións son analizadas e pode pasar que haxa unha serie de recomendacións, desde o punto de vista económico ou da seguridade, que se atenden e fan viable a operación”, recalca nunha comparecencia ante os medios. Ao seu xuízo, a de SAIC Motor é unha inversión industrial “importante” para España e por tanto, “con toda normalidade” analízanse e téñense en conta os elementos económicos, industriais, de creación de emprego e tamén de seguridade nacional.