A sangría do pequeno comercio en Galicia: case tres comercios pechados cada día en 2025

A Unión de Profesionais e Traballadores Autónomos (UPTA) alerta da sangría do pequeno comercio en Galicia. A asociación advertiu de que unha media de 89 comercios pecharon cada mes na comunidade.

Segundo os seus cálculos, “a deriva do comercio dos últimos seis anos é de máis de 6.000 pequenos comercios” que baixaron as persianas. Con todo, desde UPTA valoran que decembro de 2025 foi “mellor decembro” que en 2024, con máis de 300 afiliados que o ano anterior, de modo que o ano termina con mellor dato.

Así as cousas, o exercicio de 2025 finaliza cunha afiliación ao réxime de autónomos que en Galicia supón 596 afiliados menos no último mes, ata 204.064. Todos os sectores perden afiliación: comercio (43.329) sofre unha perda de 186 afiliados, seguido de construción (27.096) con 142 activos menos e agricultura e gandería (22.523) que perde 122.

Hostalería (20.791) baixa un total de 81 afiliados, educación (7.120) perde 44 e industria manufacturera (11.946) perde 23. Transporte (11.115), actividades sanitarias (7.967) e actividades profesionais e técnicas (18.110) tamén perden afiliación, aínda que de maneira máis lixeira: 8, 5 e 4 activos menos respectivamente.

Neste contexto, esta asociación alerta de que “a situación do pequeno comercio converteuse nunha emerxencia estrutural”, polo aumento dos custos fixos, a presión fiscal, a competencia desigual con grandes plataformas e a “falta de políticas públicas eficaces de protección e modernización”, que “están provocando un peche constante de negocios que vertebran a economía local e o emprego de proximidade”.