A tractorada en Ourense supera as 24 horas de bloqueo da A-52 en protesta contra o acordo con Mercosur.

Agricultores e gandeiros galegos mantéñense este domingo no punto da A-52 ao seu paso por Xinzo de Limia (Ourense) onde conseguiron interromper o tráfico en protesta polo acordo entre a UE e Mercosur. O corte, que comezou ás 06.15 horas do día anterior, supera as 24 horas e non hai previsión de cando se levantará.

Dende a Garda Civil indican que descoñecen cando se reanudará o tránsito pola estrada, que quedou cortada en ambos sentidos á altura do punto quilométrico 188. Dende entón, patrullas de tráfico desvían a circulación pola saída 188 –saída de Ababides para o sentido Porriño–.

Pola súa banda, un dos participantes da protesta, o gandeiro Miguel Gómez, asegurou este que non teñen intención de abandonar o punto “ata que cargue a Policía”. El foi un dos que trasnoitou na estrada ourensá: “Frío fixo moito, pero temos lume”.

Este testemuño presencial relata que nin durante a noite cesou o goteo de xente, que “iba e viña”. Nestas máis de 24 horas, apunta que o “mínimo” de persoas que alí debía de haber foi de arredor de 50 persoas; no mediodía deste domingo, calcula que permanecen alí unhas 200.

En declaracións do sábado, outro dos portavoces, Óscar Joga, cualificou o acordo de “auténtica ruína para o agro español” e reclamou: “Necesitamos que eliminen parte da burocracia e que se nos atendan as peticións cando as remitimos”.

Este agricultor xa demandou que “se lles escoite” dende as administracións. Gómez asegurou agora que aínda non recibiron ningunha comunicación de ningunha delas –nin da autonómica nin da estatal–.