Amancio Ortega pecha outra compra en Países Baixos: un centro loxístico de 132 millóns con Calvin Klein como inquilino
Pontegadea, o brazo inversor do fundador de Inditex, adquiriu unha nave a Invesco en solo holandés, onde xa se fixera con outro activo similar o ano pasado.
Roberto Cibeira, CEO de Pontegadea, e Amancio Ortega, fundador de Inditex. Fotos: Repsol e Axencia EFE
Comentarios
Nova operación de Pontegadea, o brazo inversor de Amancio Ortega dirixido por Roberto Cibeira. O grupo coruñés pechou a compra dun centro loxístico en Países Baixos por uns 132 millóns de euros, segundo adiantou o medio neerlandés especializado no sector PropertyNL. A family office do fundador de Inditex volve apostar por Holanda, onde o ano pasado xa adquiriu un activo de características similares por outros 145 millóns.
Con uns 94.000 metros cadrados de extensión, o centro loxístico estaba, ata o momento, en mans de Invesco. Localizado na cidade de Sevenum, no sueste do país, moi preto da fronteira con Alemaña, conta con espazo para 85.000 metros cadrados de terreo industrial e outros 8.500 metros cadrados de oficinas.
O activo adquirido cumpre os requisitos habituais de Pontegadea, que quere que os seus activos xeren rendas desde o primeiro día, é dicir, que estean en funcionamento e conten con clientes premium. Neste caso, entre os principais clientes das instalacións atópanse marcas da industria téxtil como Tommy Hilfiger ou Clavin Klein, baixo a súa empresa matriz estadounidense PVH (Phillips-Van-Heusen).
Praza inversora de Pontegadea
Europa e en concreto Países Baixos, converteuse nunha das prazas de investimento habituais de Pontegadea nos últimos anos. En 2025 xa adquiriu un centro loxístico en Hoofddorp por uns 145 millóns de euros, alugado ao operador loxístico GXO. Tamén e noutro sector de investimento, adquiriu o hotel Avani Museum, por outros 85 millóns.
Só en 2025 pechou dez adquisicións inmobiliarias valoradas en máis de 1.655 millóns de euros, culminando o ano coa compra dun edificio en Vancouver por 680 millóns. Deste xeito, o fundador de Inditex posúe a maior inmobiliaria española, centrada na compra e xestión de grandes edificios, cunha carteira de activos inmobiliarios integrada fundamentalmente por edificios de oficinas, non residenciais.
