Ence lanza un sistema para previr incendios que combina a intelixencia artificial co pastoreo
O proxecto SILVO+ integra intelixencia artificial para a optimización do pastoreo en función da biomasa, as condicións climáticas e o risco de incendio.
Comentarios
Ence impulsa o proxecto SILVO+, unha iniciativa para desenvolver e validar un modelo de silvopastoreo intelixente como ferramenta de prevención activa de incendios que, ao mesmo tempo, serve como vía para xerar e valorizar servizos ecosistémicos.
O proxecto integrará intelixencia artificial para a optimización do pastoreo en función da biomasa, as condicións climáticas e o risco de incendio. Ademais, contempla a validación de tecnoloxías como sistemas GPS, peches electrónicos e infraestruturas móbiles.
SILVO+ inclúe tamén o desenvolvemento dunha metodoloxía estandarizada para medir e certificar servizos ecosistémicos como carbono, biodiversidade e mellora do solo. Así mesmo, deseñará unha plataforma dixital que integrará os datos xerados e facilitará o cumprimento de requisitos regulatorios, incluída a CSRD (Corporate Sustainability Reporting Directive).
O proxecto desenvólvese en consorcio con Tenzas, empresa de consultoría forestal, e Nigal, especializada en dixitalización e análise avanzada de datos, e conta co apoio científico-técnico da Universidade de Santiago de Compostela e de Feuga (Fundación Empresa-Universidade Galega) para impulsar a difusión.
“Con esta iniciativa Ence reforza, no marco do seu Plan de Biodiversidade, unha liña de traballo aliñada coa súa estratexia en prevención de incendios e xestión forestal sostible, ao tempo que reforza a identificación, medición e valoración de servizos ecosistémicos”, explican desde a compañía nunha nota de prensa.
