Premio con subidas de soldo para Marta Ortega e García Maceiras polo novo récord de Inditex
O consello de administración de Inditex proporá á xunta de accionistas un incremento nas retribucións dos membros do consello de administración ante os "excelentes" resultados acadados nun entorno "complexo" e de incerteza no mercado.
Fotomontaxe de Óscar García Maceiras e Marta Ortega co interior do edificio da bolsa de Madrid de fondo. Fotos: Europa Press
Comentarios
Os resultados récord de Inditex deixan un particular premio para Marta Ortega e Óscar García Maceiras. E é que o consello de administración da matriz de Zara proporá á xunta de accionistas unha actualización das remuneracións tanto da presidenta non executiva como do conselleiro delegado para os exercicios 2027, 2028 e 2029.
A proposta sairá previsiblemente adiante na xunta que se celebrará o próximo 7 de xullo. No caso de aprobarse, a nova política de remuneracións (que se aplicaría tamén ao resto de consellos) entraría en vigor o 1 de febreiro de 2027, o CEO e a presidenta non executiva de Inditex verán incrementar as súas retribucións ante os “excelentes” resultados, desempeño operativo e creación de valor para o accionista entre o peche do exercicio 2021 e 2025, período marcado por un contexto macroeconómico “complexo” de elevada volatilidade financeira, incerteza e inflación de custos.
O soldo de García Maceiras
Nesta liña propóñese aumentar a retribución fixa de García Maceiras de 2,5 a 2,95 millóns de euros, o que supón un incremento do 3,7% anualizado desde a xunta xeral de accionistas de 2022 na que se estableceu a retribución fixa en vigor (2,5 millóns de euros). Este importe está previsto que se manteña sen variación durante todo o período de vixencia da política de remuneracións, isto é, ata o exercicio social 2029, incluído.
O incremento anualizado entre 2022 e 2029 sería do 2,2%, nivel de aumento que se sitúa, segundo o grupo, por debaixo da evolución da remuneración media do persoal de Inditex no mesmo período e por debaixo da evolución da retribución fixa dos primeiros executivos no Stoxx Europe 50, que entre 2021 e 2025 foi do 24,2%.
Ao incrementarse a retribución fixa, prodúcese un aumento na cantidade absoluta da retribución variable anual, ao vir determinada como un porcentaxe do fixo, aínda que a remuneración variable a longo prazo mantense sen cambios.
Non obstante, este incremento na retribución variable anual só se materializará se se cumpren os obxectivos establecidos no plan de negocio e orzamentos, mantendo así a filosofía de ‘pay for performance’.
Respecto aos elementos variables da retribución do CEO, propóñese aumentar a retribución variable anual target do 120% ao 150% da retribución fixa e entregar un 30% da retribución variable anual devengada en accións, con obriga do seu mantemento durante un prazo de dous anos desde a entrega.
Por iso a retribución total por funcións executivas de García Maceiras aumentará de 7,3 a 9,175 millóns de euros, equivalente a un incremento do 5,2% anualizado desde a xunta de 2022.
“As conclusións das avaliacións do desempeño do conselleiro delegado, levadas a cabo anualmente polo consello de administración, reflicten unha evolución moi positiva e a súa consolidación no posto. En definitiva, conséguese un posicionamento prudente e competitivo, con incrementos anualizados que se manteñen contidos”, sinala a compañía.
Marta Ortega pasa do millón de euros
Por outra banda, Marta Ortega tamén verá actualizada a súa remuneración como presidenta do consello de administración, ao pasar de 900.000 euros a 1,05 millóns de euros a partir de 2027, o que supón un incremento do 3,5% anualizado desde a xunta xeral de accionistas de 2022.
A comisión de Retribucións considera que a actualización da asignación correspondente ao cargo de presidenta non executiva do consello reflicte “adecuadamente” a relevancia institucional, estratéxica e representativa asociada ao desempeño de dito cargo nun grupo coa dimensión, presenza internacional e complexidade operativa de Inditex.
Desde 2022, baixo a lideranza de Ortega, o grupo reforzou o seu posicionamento internacional e a proxección global das súas marcas, consolidando así mesmo a calidade e recoñecemento externo das súas prácticas de goberno corporativo e fortalecendo a representación institucional da sociedade “ao máis alto nivel”. Igualmente, a remuneración por pertenza ao consello pasará de 100.000 a 150.000 euros, que representa un incremento do 2,6% anualizado desde o exercicio 2011 cando se estableceu a cantidade actualmente vixente.
A comisión de Retribucións considera que a evolución da actividade e funcionamento do consello de administración durante os últimos anos reflicte un incremento “significativo” no nivel de dedicación e responsabilidade esixido aos seus membros, tanto polo aumento do número de sesións e materias obxecto de supervisión como pola crecente complexidade regulatoria, estratéxica e de sustentabilidade asociada á actividade do grupo.
Segundo a compañía, ditas modificacións perseguen manter unha proporción “razoadable” entre o sistema retributivo e a importancia, dimensión e complexidade da sociedade, os resultados alcanzados e a creación de valor para os accionistas, “axustándose á evolución das responsabilidades e dedicación asociadas aos distintos cargos e asegurando a competitividade externa do sistema retributivo conforme ás prácticas observadas en compañías comparables”.
