Rosa Carabel, CEO de Eroski, asume a presidencia de Vego Supermercados

Rosa María Carabel asume o mando de Vego Supermercados. O Boletín Oficial do Rexistro Mercantil (Borme) da Coruña recolleu na súa edición deste martes o nomeamento da executiva coruñesa como nova presidenta desta sociedade que en 2005 se fusionou con Mercash Sar, pasando a ser a matriz de ambas Vegalsa-Eroski.

Carabel, graduada en Ciencias Empresariais pola Universidade de Santiago de Compostela, MBA pola Escola de Negocios de Vigo e Advanced Management Program polo IE Business School, multiplícase así no sector empresarial.

E é que a directiva coruñesa exerce desde xullo de 2022 como CEO do Grupo Eroski. A súa vinculación coa firma vasca remóntase ao ano 2004, cando chegou procedente precisamente de Vegalsa-Eroski (era directora de marketing) e fixo as maletas cara ao País Vasco para asumir as rendas da división de Autoservicios de Eroski.

Posteriormente, Rosa Carabel faríase coa dirección económico-financeira e a dirección xeral de Rede antes de converterse en directora xeral en 2021 e CEO en 2022.

Rosa Carabel releva a Javier Amezaga

Carabel releva no cargo a Javier Amezaga, de quen xa colleu o relevo na dirección xeral de Eroski en 2021. O executivo vasco desempeñou a partir de entón un cargo de director corporativo nunha andaina á que puxo punto final a comezos de 2025.

Foi entón cando Amezaga deu un paso adiante na Corporación Mondragón (dona de Fagor, Orbea, Orona, Laboral Kutxa ou Eroski) e pasou de ser conselleiro a vicepresidente.

Deste xeito, Rosa Carabel pasa a exercer como presidente de Vego Supermercados, sociedade que está integrada dentro dun grupo Vegalsa-Eroski cuxa sociedade dominante, Vegonsa Agrupación Alimentaria (con domicilio en Vigo),
está participada por Newcobeco (firma pertencente ao Grupo Eroski).

A orixe de Vegonsa Agrupación Alimentaria (Vegalsa) remóntase a 1998, ano no que a sociedade Savengo selou unha alianza estratéxica co Grupo Eroski para crear un xigante que pechou o seu exercicio fiscal 2024 con 1.640 millóns de euros de facturación e 7.731 traballadores en plantilla.