Un xulgado condena a Lidl por vulnerar o dereito a folga de 76 traballadores do seu almacén en Narón.

O Xulgado do Social número 2 de Ferrol condena a Lidl Supermercados SAU. A maxistrada fixou o pago dunha indemnización colectiva de 50.000 euros a 76 dos seus traballadores da plataforma loxística de Narón por vulnerar o seu dereito fundamental á folga durante un conflito laboral que se prolongou entre febreiro e maio de 2023.

Na sentenza, a titular do Xulgado do Social número 2 de Ferrol declarou probado que a empresa incorreu en “esquirolaxe organizativa”, unha práctica consistente en desviar parte da carga de traballo da plataforma do polígono industrial de Río do Pozo a outros centros loxísticos da compañía, co obxectivo explícito de “minimizar os efectos” da folga. Esta conduta xa fora declarada ilícita nunha sentenza firme previa, que condenou á multinacional a indemnizar ao sindicato CIG con 25.000 euros por dano moral colectivo.

A cronoloxía da folga

O conflito, convocado de forma indefinida a partir do 14 de febreiro de 2023 polo “reiterado incumprimento” do convenio en materia de horas extras, foi secundado por 96 traballadores de almacén. A empresa respondeu, segundo se acredita na sentenza, desviando rutas de subministración de 27 tendas de Galicia, Asturias e León á plataforma de Nanclares de Oca só dez días despois do inicio do paro, sen unha xustificación organizativa lexítima.

Neste sentido, aínda que Lidl alegou que o seu modelo loxístico é flexible, o tribunal considerou que, neste contexto, o desvío perseguía “en realidade minimizar os efectos da folga”.

Probas testemuñais e documentais demostraron que, incluso despois dunha primeira sentenza condenatoria en maio de 2023, camións doutras plataformas como Alcalá de Henares, Sevilla ou o País Vasco seguiron abastecendo a supermercados da área de influencia de Narón ata a finalización da folga o 21 de maio.

A demanda reclamaba, ademais da indemnización por dano moral, o pago dos salarios e as cotizacións sociais deixados de percibir durante os días de folga. Con todo, a xuíza desestima esta pretensión, baseándose na doutrina do Tribunal Supremo que establece que a perda do salario é un efecto legal “consustancial e inherente” ao exercicio do dereito de folga, e non un dano adicional derivado da conduta ilícita da empresa.

A indemnización de 50.000 euros fíxase, polo tanto, en concepto de danos morais individuais. A cantidade repartirase entre os 76 traballadores en proporción ao número de días que cada un deles secundou a folga, que oscilou entre 78 e 96 xornadas. A sentenza non é firme e pode ser recorrida ante o Tribunal Superior de Xustiza de Galicia (TSXG).