Abanca dá por feito un incremento da rendibilidade este ano tras bater o seu récord na concesión de crédito

Abanca pechou o primeiro semestre do exercicio con uns beneficios de 386 millóns, o que supón un retroceso do 9,6% en comparación co mesmo período do ano anterior. A caída dos beneficios débese fundamentalmente aos impostos, xa que a taxa fiscal efectiva incrementouse polo menor uso de créditos fiscais. O beneficio antes de impostos, con todo, aumentou un 3,7% na comparativa interanual.

A evolución do exercicio vén marcada por unha maior actividade comercial. Nos seis primeiros meses do ano, a herdeira das antigas caixas galegas captou 77.000 novos clientes, cun 71% das altas fóra de Galicia. Deste xeito, a entidade de Juan Carlos Escotet avanza no obxectivo de converterse nun banco ibérico, con Portugal representando xa máis de 17.000 millóns do volume de negocio (créditos + depósitos).

A concesión de crédito situouse en niveis récord, con 10.000 millóns de nova financiación. Destos, Portugal representou o 32%, mostrando un comportamento por riba da media do grupo.

Co récord en nova financiación, Abanca deu a volta a unha asignatura pendente. O marxe de intereses creceu un 4% respecto ao primeiro trimestre de 2026 e un 2,1% respecto ao segundo de 2025. “Isto lévanos a unha evolución positiva nos márxes nos próximos trimestres de xeito case automático”, dixo o conselleiro delegado, Francisco Botas, durante a presentación de resultados do banco.

A pesar diso, o ROTE, o indicador de referencia en canto a rendibilidade, continuou recortándose. Situouse ao peche de xuño no 12,2%, fronte ao 13,2% do trimestre anterior. O incremento dos gastos de explotación é do 3,3%, por debaixo do 5,3% da media do sector bancario, o que apunta a unha mellora da produtividade.

Gaña cota en todos os segmentos

Indicou Juan Carlos Escotet que non ven oportunidades de compra a curto e medio prazo, polo que van concentrar o groso dos seus esforzos no crecemento orgánico, aproveitando aínda senerxías pendentes coas últimas adquisicións, como Eurobic. Isto é un terreo diferente ao que percorreu Abanca na súa traxectoria, con 10 operacións de crecemento inorgánico desde 2014.

Por agora, a entidade financeira conseguiu un récord de nova financiación e gañou cota de mercado en todas as súas áreas de negocio. Crece especialmente en seguros xerais, con 12 puntos máis, e en crédito a clientes, cunha subida de 8 puntos. Os recursos fóra de balance (fondos de investimento, pensións e seguros de aforro) alcanzan os 22.070 millóns de euros, un incremento do 23,3% en termos interanuais.

As primas de seguros xerais e de vida risco aumentaron un 11,4%, ata os 719 millóns de euros; as de defuncións creceron un 25%, mesma cifra que as de seguros de vida risco. Pola súa banda, as primas de seguros de empresas incrementáronse nun 16%, e as de seguros de saúde nun 12%.

Menos morosidade

A taxa de morosidade de Abanca ao peche de xuño situouse no 1,9%, por debaixo do 1,97% do primeiro trimestre. Os saldos dubidosos redúcense un 10% respecto ao mesmo período de 2025 e os adxudicados un 16%, representando só un 0,1% no balance. A entidade contaba cun exceso de capital sobre requisitos de 2.127 millóns, un 8,3% máis, o que, a xuízo da cúpula do banco, amosa unha moi boa posición de solvencia a pesar do esforzo inversor dos últimos anos para engordar o grupo. A posición de liquidez sitúase nos 20.982 millóns, como resultado dos 20.982 millóns en activos líquidos e a capacidade de emisión de cédulas por valor de 7.741 millóns.

Francisco Botas volveu insistir en que o banco ten un pay-out baixo en comparación co sector e situouno no 40%. Tamén Juan Carlos Escotet, que percibe a inmensa maioría do dividendo de Abanca, destacou no primeiro trimestre a contención na retribución. Despois da presentación de resultados, o banco comunicou á CNMV a distribución dun dividendo de 71,4 millóns con cargo aos beneficios de 2026. En abril repartiu outros 82,9 millóns.