Rueda defende que as protestas en Galicia son «para crear tensión», non como a de Madrid.
Despois de que o PP criticase mobilizacións da CIG e as vinculase a obxectivos políticos do BNG, o presidente da Xunta di que a manifestación de Feijóo era diferente e non buscaba incidir nun clima de tensión senón "trasladar o que opinan moitas persoas"
Rueda comparece tras o Consello da Xunta. – DAVID CABEZÓN @ XUNTA
Comentarios
Alfonso Rueda defendeu a concentración convocada en Madrid polo seu xefe de filas, Alberto Núñez Feijóo, á que asistiu este domingo liderando a delegación galega do PPdeG. Ao xuízo do presidente da Xunta, esa mobilización era diferente ás que criticou nas últimas semanas o seu partido en Galicia, chegando a vinculalas con obxectivos políticos do BNG. Rueda cre que as protestas domésticas para pedir profesores ou contra a saturación nas urxencias teñen a intención de xerar un clima de tensión, mentres que a dos populares non.
O dirixente autonómico alega que non se percibían esas “intencións” este domingo en Madrid, senón que se lanzou “de forma pacífica e ordenada” a mensaxe de que a situación é “insostible”, que, ao seu modo de ver, comparten “moitas persoas” en Galicia e no conxunto do país. A diferenza está, conclúe o tamén líder do PPdeG, nos “condicionantes”.
Defendeu que el non se manifestou para incidir nun clima de “crear tensión” senón para trasladar “o que opinan moitas persoas e non só votantes do PP, senón que seguro que tamén moitos do PSOE”: “que a situación é insostible, cun caso de corrupción case diario; e ministros e ministras sempre pendentes de contrarrestar o último escándalo”.
Eleccións
Preguntado acerca de cal é o límite que se pon para considerar que unha protesta é “algarada”, replicou que, no caso do BNG, eses termos son “os mesmos” que utilizan os propios impulsores da protesta, en relación a “crear tensión para conseguir os seus obxectivos”, políticos ou de outra índole.
Enfronte, insistiu que en Madrid buscábase outra cousa, comezando por ampliar “con pleno coñecemento” a mensaxe de que a situación é “insostible” incluso para quen foron votantes do PSOE. Se o presidente estatal, Pedro Sánchez, ten outra percepción, Rueda advertiu que “o ten facilísimo” e instouno a convocar eleccións.
