A asemblea de Inditex que dará a benvida a Cibeira tamén aprobará un plan de incentivos para directivos

O próximo martes celebrarase a asemblea de accionistas de Inditex, momento no que a presidenta non executiva do grupo, Marta Ortega, acostuma a dar unhas palabras desde a súa chegada ao cargo. Na cita, que terá lugar na sede da multinacional, en Arteixo, está previsto que os socios da multinacional aproben un plan de incentivos a longo prazo en efectivo e accións dirixido aos membros do equipo directivo, incluídos os conselleiros executivos, como Óscar García Maceiras, e outros empregados do grupo. En total, un máximo de 750 beneficiarios.

En concreto, o plan consiste na combinación dun bonus plurianual en efectivo e dunha promesa de entrega gratuíta de accións que, transcorrido un período de tempo determinado e verificado o cumprimento dos obxectivos concretos, abonarase aos beneficiarios do plan, na súa totalidade ou no porcentaxe que resulte de aplicación.

Plan de catro anos

O número máximo de accións obxecto do plan é de 4,5 millóns de accións ordinarias, representativas do 0,14% do capital social, e valoradas en 195,3 millóns de euros en función dos actuais prezos de mercado. Delas, un máximo de 105.556 títulos están dirixidos ao conselleiro delegado, Óscar García Maceiras.

Este plan ten unha duración total de catro anos e está estruturado en dous ciclos temporais, sendo cada un independente do outro.

Así, o primeiro ciclo do plan esténdese desde o 1 de febreiro de 2025 ata o 31 de xaneiro de 2028, mentres que o segundo abrangue desde o 1 de febreiro de 2026 ata o 31 de xaneiro de 2029.

Ola a Civeira

Igualmente, o consello acordou propor á asemblea o nomeamento de Roberto Cibeira Moreiras, conselleiro delegado de Pontegadea, como membro do consello de administración, coa categoría de conselleiro dominical. Desta forma, Amancio Ortega introduce no consello de téxtil a un dos seus homes fortes na xestión do seu patrimonio ante a xubilación do seu histórico número dous, José Arnau.

O consello de administración de Inditex considera que Cibeira Moreiras conta coas competencias, experiencia e méritos adecuados para desempeñar o cargo.

“Á vista da súa formación e ampla experiencia profesional considérase que Cibeira é un experto na xestión empresarial, tendo ocupado cargos executivos de primeiro nivel, entre outros, en dirección estratéxica e de xestión de activos, e con ampla experiencia no campo da auditoría e a xestión e supervisión de riscos, o que lle otorga competencias no control e supervisión financeiro e no cumprimento normativo e, ademais, todo iso, con unha visión crítica”, sinala.

“A súa experiencia en consellos de administración de diversas sociedades, tamén de moi diferentes sectores e mercados xeográficos, atribúelle coñecementos en aspectos de gobernanza e sobre as dinámicas dos órganos de goberno”, engade o consello de administración no informe presentado ante a asemblea.

Adeus a Arnau

O nomeamento de Cibeira Moreiras ven motivado porque José Arnau, home de confianza de Amancio Ortega, deixará a vicepresidencia do grupo Inditex, posto que ocupa desde xuño de 2012, tras a celebración da xunta xeral de accionistas.

Así mesmo, Arnau, ata a data vicepresidente de Pontegadea, comunicou a dita sociedade a súa vontade de acceder á xubilación o próximo 1 de outubro, polo que cesará como conselleiro tras 24 anos de exercicio das súas funcións vinculadas ao grupo. O directivo continuará ocupando a vicepresidencia executiva da Fundación Amancio Ortega e asesorando á familia.

Pola súa banda, Cibeira foi asumindo nos últimos meses as funcións executivas que deixará o actual vicepresidente, segundo informou Pontegadea.

Dividendo

Por outro lado, a asemblea de accionistas do grupo galego aprobará un dividendo de 1,68 euros por acción con cargo aos resultados do exercicio 2024.

Este dividendo compónse de dous pagos iguais de 0,84 euros por acción: o primeiro realizouse xa o pasado 2 de maio de 2025 e o segundo realizarase o 3 de novembro de 2025.