A aeroliña galega Fly2Galicia estreará en decembro as súas oito rutas desde o aeroporto de Santiago.
A nova aeroliña anunciou que comezará a operar o 1 de decembro unha nova base no aeroporto de Santiago de Compostela, onde porá en marcha rutas a Bruxelas, Praga, Múnic, Venecia, Milán, Zaragoza, Alacante e Granada.
Imaxe do anuncio de novas rutas por parte de Fly2Galicia / @Fly2Galicia
Comentarios
O capital autóctono dá o salto ao sector da aviación. Fly2Galicia anunciou este domingo que comezará a operar a partir do 1 de decembro coa apertura dunha base no aeroporto de Santiago de Compostela, desde onde voará a ata oito destinos diferentes cun total de 17 frecuencias semanais.
Destas oito cidades, cinco son destinos internacionais: Bruxelas, Praga, Múnic, Venecia e Milán. A estas súmanse tres conexións domésticas (Zaragoza, Alicante e Granada), que a operadora deu a coñecer a través das súas redes sociais.
Segundo detallou, o voo inaugural, que sairá o mesmo 1 de decembro, será o de Santiago-Zaragoza. Para ese mesmo día están programados outros dous voos internacionais, que de momento non concretou. O resto de conexións comezarán a funcionar esa mesma semana.
O próximo martes, 18 de agosto, habilitará a web para reservas. Entón, o público poderá consultar ao detalle as frecuencias, horarios e prezos. Con todo, anticipou que as viaxes ás tres cidades españolas custarán desde 19 euros; os pasaxes a Milán e Bruxelas venderanse a partir de 39 euros, e os voos a Múnic, Praga e Venecia sairán desde 49 euros.
A aeroliña asegurou que mesmo a tarifa máis reducida incluirá dúas pezas de equipaxe de man; en concreto, unha maleta de cabina de oito quilos e un artigo persoal.
