A CEG aperta ao Goberno polo xaque ao Corredor Atlántico

A Confederación de Empresarios de Galicia (CEG) pide explicacións ao Goberno pola situación do Corredor Atlántico. A patronal que lidera Juan Manuel Vieites reclamou coñecer o contido do Plan Director do Corredor Atlántico e esixiu garantías para que Galicia non quede fóra da rede.

Nunha nota de prensa, a organización empresarial informou de que este luns se produciu unha reunión extraordinaria na que se analizaron as informacións coñecidas nos últimos días sobre unha posible renuncia do Goberno de España á implantación da ancho ferroviario europeo.

Tras analizar a información que transcendeu sobre o informe remitido polo Ministerio de Transportes e Mobilidade Sostible á Comisión Europea, desde a patronal galega subliñan que “resulta prematuro extraer conclusións definitivas”, mentres non se faga público o contido íntegro do informe nin se coñezan as implicacións concretas que esta decisión terá para Galicia.

Neste sentido, a CEG recordou que o Regulamento europeo da Rede Transeuropea de Transporte (TEN-T) obriga aos Estados membros a avaliar que liñas ferroviarias migrarán á ancho estándar e, posteriormente, a elaborar un Plan de Migración co seu correspondente calendario de actuacións.

Con todo, desde a entidade matizan que “nin ese informe nin esa planificación foron trasladados aos axentes económicos e sociais”, a pesar de tratarse de decisións “estratéxicas” que condicionarán o futuro da competitividade empresarial.

Así mesmo, a Comisión de Infraestruturas da CEG considera que o verdadeiro debate non debe centrarse unicamente na conveniencia ou non de transformar toda a rede ferroviaria española, senón en coñecer cal será a planificación para Galicia, que actuacións están previstas no Corredor Atlántico e como se garantirá a interoperabilidade ferroviaria.

A CEG manifestou a súa “preocupación” polas posibles consecuencias que unha falta de planificación poderían ter para Galicia. Por iso, afirmou que neste momento “corren o risco de perpetuar non só o illamento cara o exterior, senón de crear verdadeiras fronteiras ao transporte nacional por ferrocarril”.

A CEG pide “claridade e certidume”

Tamén, seguen a botar en falta “claridade e certidume” sobre como circularán as mercadorías desde o norte e sur de Galicia. “Nós viñemos demandando, reiteradamente, e desde hai moitos anos, a necesidade de que as mercadorías saian polo norte, desde Ferrol, A Coruña e Lugo cara a Monforte, para o cal é imprescindible a electrificación e desde o sur, desde Vigo e Pontevedra vía Ourense cara a Monforte“, expresaron.

Ademais, a CEG indicou que as decisións sobre o ancho de vía “non poden adoptarse de maneira illada”, senón que deben coordinarse coa implantación do sistema europeo de xestión do tráfico ferroviario (ERTMS), coa electrificación da rede e co desenvolvemento das infraestruturas ferroviarias en Francia e Portugal.

Durante a reunión tamén se informou do contido do recente encontro mantido en Bruxelas co coordinador europeo do Corredor Atlántico, François Bausch, e co comisionado do Goberno de España para dito corredor.

Nese encontro, a CEG, xunto coas organizacións empresariais do noroeste, reiterou a “necesidade de reforzar o Corredor Atlántico como infraestrutura estratéxica para a competitividade empresarial” e trasladou a “importancia” de que Galicia dispoña dunha planificación ferroviaria “clara, transparente e aliñada cos obxectivos europeos de interoperabilidade”.

Finalmente, a Comisión de Infraestruturas acordou reclamar ao Ministerio de Transportes a publicación do informe remitido á Comisión Europea, a presentación do futuro Plan de Migración previsto no Regulamento europeo e a creación inmediata do grupo de seguimento do Corredor Atlántico comprometido polo Goberno. Ademais, insistiu en pedir o Plan Director do Corredor Atlántico, que “foi presentado en 2024 pero do que non coñecen o texto completo”.