Cese no consello de Bimba y Lola: sae Cristina Trujillo, ex CEO de Etnia e directiva de Desigual.
A executiva formou parte do primeiro consello de administración da compañía de María e Uxía Domínguez, creado en 2020, como independente e polo seu coñecemento en internacionalización.
Establecemento de Bimba y Lola en Londres / Bimba y Lola
Comentarios
Cambios no consello de administración de Bimba y Lola, a terceira maior téxtil galega por volume de negocio. O grupo que dirixen María e Uxía Domínguez cesou a Cristina Trujillo, quen fora CEO de Etnia Barcelona entre decembro de 2017 e abril de 2019. Formada en
Harvard e Stanford, ademais de contar cun MBA en IESE, a executiva formou parte do primeiro consello de administración da compañía galega, constituído en 2020.
Naquel momento, Bimba y Lola defendía a incorporación como conselleira independente de Trujillo polos seus “máis de 20 anos de experiencia
internacionalizando marcas en Europa, Asia, Oriente Medio e Latinoamérica”. Gran parte desta traxectoria desenvolveuna en Desigual, onde estivo 11 anos desempeñando cargos relevantes. Foi axunta ao CEO, directora de Estratexia, directora do negocio en Asia e responsable de Franquías (Wholesale).
Cristina Trujillo Parra
Este perfil de experta en internacionalización e gran coñecedora da industria da moda serviu á tamén conselleira do Department Store Felix Maduro de Panamá para irrumpir no grupo da familia Domínguez, que naquel momento abriu a compañía á entrada de independentes nun proceso de profesionalización vinculado tamén ao cumprimento do seu plan estratéxico. “Abrimos o Grupo a un consello que incorpora perfís independentes e valiosos, que nos axudarán enormemente a desenvolver a nosa estratexia sen renunciar ao noso carácter familiar“, dixo entón a presidenta, Uxía Domínguez.
A baixa de Trujillo naquel primeiro consello de Bimba y Lola súmase á de José María Castellano, que cesou do cargo pouco antes do seu falecemento. Ao órgano de administración incorporouse en 2024 Sylvie Colin, exdirectora xeral de Kenzo. As irmás contan co apoio como conselleiro dominical do seu pai, Jesús Domínguez, irmán do deseñador ourensán Adolfo Domínguez e cofundador de Sociedad Textil Lonia, o segundo maior grupo de moda de Galicia, que comercializa as marcas Carolina Herrera e Purificación García.
