Ferri monta unha empresa en Canadá con Cellula Robotics para facilitar operacións en espazos marítimos hostís.
A compañía de Gondomar constitúe mediante unha 'joint venture' a empresa Nautical Reach Systems, que deseñará e fabricará sistemas de movemento e operación de vehículos autónomos.
A pontevedresa Industrias Ferri pecha unha alianza con Cellular Robotics para montar unha empresa conxunta en Canadá centrada no ámbito da defensa e as plataformas marítimas.
Comentarios
A compañía Industrias Ferri, con base de operacións en Gondomar, acaba de dar un paso de xigante na súa expansión internacional ao constituír unha compañía en Canadá xunto coa empresa Cellula Robotics, tamén canadense. A joint venture resultante Nautical Reach Systems, situada na costa leste do país, deseñará e fabricará sistemas de movemento, elevación e operación de vehículos autónomos. A súa oferta, explican, “abarcará o lanzamento e a recuperación intelixentes, así como a manipulación de cargas complexas en vehículos de superficie e submarinos non tripulados”.
“Para as forzas navais, de gardacostas e do sector offshore, as plataformas autónomas que operan máis alá do horizonte ou lonxe dos medios de apoio convencionais necesitan sistemas de operación seguros e fiables no mar. Nautical Reach Systems deseñará as súas solucións en función da misión, o buque de apoio, o entorno das operacións e nos escenarios máis remotos e extremos, incluíndo o Ártico e o fondo mariño”
Expertos en enxeñaría naval
“Tras máis de 60 anos deseñando sistemas de manipulación de cargas para as mariñas de todo o mundo, sabemos que a fiabilidade dun equipo depende en gran medida da reflexión que se leva a cabo antes da súa fabricación”, explica Patricio Fernández, conselleiro delegado de Ferri.
Na joint venture, o que fai Ferri é aportar a súa experiencia en enxeñaría naval e no deseño e fabricación de sistemas avanzados de manipulación de cargas para o sector da defensa. “Como provedor de confianza de armadas de todo o mundo, a compañía desenvolve solucións a medida adaptadas aos requisitos de cada buque e misión, e conta actualmente con equipos instalados en centos de buques a nivel internacional”, lembra a compañía galega.
A canadense Cellula achega 25 anos de enxeñaría submarina e un rendemento demostrado no mar, con experiencia no subministro de sistemas submarinos de longa autonomía e na integración de vehículos, cargas útiles e apoio operativo axustados a cada misión.
Investimento “multimillonario”
Ferri avanza que levará a cabo un “investimento multimillonario” en Canadá para erguer a nova empresa que posicionará á compañía galega no mercado norteamericano nun momento no que a firma de Gondomar toma posicións no desenvolvemento da industria de defensa tanto en España como no país americano.
