KKR, socio de Amancio Ortega en Q-Park, puja por un dos reis dos aparcadoiros de España e Portugal

Non decae o gusto de KKR polos aparcadoiros, pois no medio do seu periplo con Amancio Ortega en Q-Park, prepara unha oferta de 10 díxitos por un dos maiores operadores do sector en España e Portugal. O fondo estadounidense é un dos que mostrou interese pola adquisición de Empark, compañía con 370 contratos e preto de 362.000 prazas de aparcamento en España e Portugal a peche de 2024. Na súa carteira está o aparcamento da Fábrica de Tabacos da Coruña; o do centro comercial Área Central de Santiago; o da Praza de Portugal de Vigo; ou o da Alameda de Pontevedra.

Segundo avanza Expansión, o grupo fundado por Henry Kravis e George Roberts podería poñer 2.000 millóns sobre a mesa para facerse coa compañía, que puxo á venda outro fondo, Macquarie, que pretende recibir as propostas non vinculantes antes de que acabe o ano. KKR está disposto a competir en solitario e non no marco de Q-Park, onde ademais de contar con Pontegadea como socio, tamén comparte accionariado con Interogo, vehículo inversor vinculado aos fundadores de Ikea.

Os competidores de KKR

O cambio de mans de Empark, herdanza da antiga división de aparcadoiros de Ferrovial, dá continuidade á agitación no sector dos aparcadoiros, que máis alá do desembarco de Amancio Ortega, viviu importantes operacións na última etapa, como a venda de Parkia ou a fusión entre Saba e Interparking. O interese non decae, pois todo apunta a que KKR atoparase cun puñado de competidores.

Entre eles estaría EQT, que podería concorrer en alianza con Indigo; a xestora suíza Partners ou a estadounidense Stonepeak, segundo sinalaron fontes do mercado a Expansión. Macquarie xa mantivera conversas coas potenciais compradoras, aínda que é agora cando dá o pistoletazo de saída ao proceso coa distribución do caderno de venda.

En 2024, o grupo obtivo 211 millóns de ingresos e un ebitda de 107 millóns.