Profand, provedor de peixe de Mercadona, consegue luz verde de Competencia para engulir Unión Martín
O grupo galego consolídase por riba dos 1.000 millóns de ingresos coa operación, á que suma a ampliación da antiga planta de Isidro de la Cal en Cambre.
Traballadoras do Grupo Profand, no concello coruñés de Cambre, pelan gambas. Foto: EFE/Cabalar
Comentarios
A Comisión Nacional dos Mercados e a Competencia deu o visto bo á compra de Unión Martín por parte de Profand, o maior provedor galego de Mercadona. A dirección de Competencia resolveu “autorizar a operación de concentración”, que permitirá á compañía de Enrique García Chillón consolidar os seus ingresos por riba dos 1.000 millóns.
Profand pechou o último exercicio cunha cifra de negocio de 1.116 millóns, mantendo a súa posición como a maior pesqueira de España por riba de Nova Pescanova, que tradicionalmente ocupaba esa posición de liderado. O grupo canario, tamén provedor da cadea de Juan Roig, obtivo unha cifra de negocio de 127 millóns de euros en 2025, fronte aos 135 do ano anterior. As vendas consolidadas decreceron un 6%, pero unha maior contención de gastos nos seus aprovisionamentos fixo que o resultado de explotación da compañía, propio da súa actividade, pasase dun negativo de 2,1 millóns a un positivo de 1,2 millóns.
O grupo galego acordou a adquisición de Unión Martín o pasado maio coa sociedade de capital risco Alantra Private Equity. A operación enmárcase no plan de crecemento de Profand e chegou un ano despois de que Enrique García Chillón recuperase o 24% da compañía que estaba en mans dos March, a través de Corporación Financeira Alba.
Tamén nesta estratexia de crecemento da compañía viguesa se enmarca a aposta pola antiga planta de Isidro de la Cal en Cambre, que Profand comprou durante o proceso de liquidación da histórica empresa coruñesa. O provedor de Mercadona prevé unha inversión de máis de 20 millóns que lle permitirá triplicar a produción de langostino cocido nas instalacións.
