Telefónica, Indra, Plexus ou Altia compiten pola IA da Xunta contra o abandono escolar

A IA é unha tecnoloxía disruptiva e a Xunta ten intención de utilizala na forma de deseñar, xestionar e avaliar as políticas educativas. Con esa vocación lanzou o proxecto EdugalIA, que segundo a Consellería de Educación, agora afanada en quitar ferro ás protestas dos profesores pola falta de recursos e persoal, permitirá dispoñer de infraestruturas analíticas que integren todas as fontes de datos e, deste xeito, mellorar en cuestións fundamentais como a identificación de situacións de risco como o abandono escolar para unha atención máis especializada, personalizada e inclusiva”.

A iniciativa permitirá crear por primeira vez o expediente dixital único do alumnado, que o acompañará ao longo de toda a súa traxectoria académica, e desenvolverá un espazo entre familias, centros e Xunta para asistencia e información áxil e personalizada. A implementación tecnolóxica do proxecto, un contrato de 13,5 millóns repartido en dous lotes, despertou o interese de 18 empresas, que presentaron 12 ofertas á licitación. Sete delas presentáronse aos dous lotes licitados; outras dúas fixérono unicamente ao primeiro lote (de servizos de I+D), e tres optaron por centrarse no segundo lote (de despregamento de solucións).

As grandes tecnolóxicas

Aos dous lotes optan Indra, NTT Data (antiga Everis), Neoris e HP, así como as UTEs Mainjobs–Ticsmart, Plexus–Altia–Bahía Software e EdugalIA (composta por One Million Bot, Sercaman 1, Ghenova Digital e Ghenova Enxeñaría). Só ao primeiro lote optan as UTEs Inetum–DXC e Fujitsu–Telefónica EdugalIA, mentres que ao segundo lote concurren Telefónica, Atos e a UTE DXC–Inetum. Chaman a atención as alianzas entre Telefónica e Fujitsu, que veñen de competir polos supercomputadores do Cesga; e de Plexus e Altia, as dúas maiores tecnolóxicas galegas.

A Consellería de Educación perfilou este proxecto como “a maior iniciativa de IA ao servizo da mellora educativa de todo o Estado”. “De feito, nunca antes unha iniciativa escolar fora beneficiaria dun proceso de Compra Pública Innovadora, o que a sitúa á vangarda das políticas públicas en materia de I+D+i”, destaca o departamento de Román Rodríguez.

O concurso

A fase actual abarca dúas partes. Está previsto que a primeira de servizos de I+D se desenvolva entre 2026 e 2028; e a segunda de adquisición e despregamento das solucións correspondentes, entre 2028 e 2030. O departamento de Educación da Xunta analizará a solvencia das empresas e UTEs que se presentaron á licitación para invitar ás cinco mellor situadas de cada lote a presentar os seus proxectos. Terán que detallar a súa folla de ruta para afrontar os traballos e os equipos humanos que intervirán no deseño, construción e despregamento das solucións a levar a cabo.

A Xunta avanza nos comezos deste desenvolvemento tecnolóxico para a xestión escolar que leva aparellado un orzamento total de 16,5 millóns de euros. Deste total, 6,6 serán achegados pola Xunta e os 9,9 restantes proceden do fondo Europeo de Desenvolvemento Rexional FEDER/FEDER no marco do Programa Plurirrexional de España 2021-2027.