Galicia irrompe no ‘top 5’ das comunidades máis exportadoras tras adiantar a Euskadi.
A comunidade ocupa a quinta posición no ranking nacional, segundo os datos do Ministerio de Economía, con exportacións entre xaneiro e outubro do pasado ano por valor de 2.595,2 millóns, só superada pola Comunidade Valenciana, Andalucía, Madrid e Cataluña, que encabeza o listado.
Imaxe de arquivo dunha terminal de contedores nun porto.
Comentarios
Galicia emerxe entre as comunidades con maior volume de exportación. A comunidade sitúase en quinta posición con unhas exportacións entre xaneiro e outubro do ano pasado que ascenderon aos 2.5952 millóns, só superada pola Comunidade Valenciana, con case 3.1022 millóns; Andalucía, con 3.3970; Madrid, con 4.5073; e Cataluña, que encabeza o ranking cos seus 84.764 millóns.
Así o revelan os datos do último informe de comercio exterior do Ministerio de Economía, no que País Vasco pasaría a ocupar o sexto posto da listaxe con unhas exportacións de 25.083 millóns, retrocedendo un posto respecto ao mesmo período do ano anterior. En concreto, durante os dez primeiros meses do 2024 as exportacións en País Vasco ascenderon aos case 26.201 millóns, que o levaron a ocupar a quinta posición, por riba dos 25.728 de Galicia.
Fonte: Informe de comercio exterior do Ministerio de Economía
Por provincias, Pontevedra foi a que máis exportacións rexistrou, con 12.967 millóns, seguida de A Coruña, con 11.522. A maior distancia atópanse Ourense, con 970 e Lugo, con 493.
Os territorios que menos volume de exportacións xeraron España entre xaneiro e outubro do 2025 foron as Illas Canarias, con 2.527 millóns, seguida das Illas Baleares (2.065 millóns) e La Rioja (1.993 millóns). A moita máis distancia situáronse as cidades autónomas de Ceuta e Melilla, con 15,5 e 9,5 millóns, respectivamente.
Principais sectores económicos
A nivel estatal, do total de exportacións, que alcanzaron os 324.773 millóns, o sector que rexistrou un maior volume é o de bens de equipo, con 62.431 millóns. O informe do Ministerio de Economía sinala dentro deles aos “outros bens de equipo” como a partida que rexistrou máis exportacións, con 29.229 millóns, entre os que se atopan motores, aparellos eléctricos ou aparellos de precisión.
O segundo sector con maior volume de negocio no exterior é o de alimentación, bebidas e tabaco valorado en 62.380 millóns. Dentro del é o das froitas, hortalizas e legumes os que concentran maior número de exportacións, con 21.266 millóns, seguido dos produtos cárnicos, con 10.845, e os aceites e graxas, con 6.222.
Respecto á taxa de variación interanual, o sector que maior crecemento experimentou, dun 8,6%, é o das materias primas, en concreto, os minerais, que aumentou un 15,6% ata os 4.949 millóns.
Pola súa banda, o que maior retroceso rexistrou é o dos produtos enerxéticos, con un 15,3%, marcado pola caída do 45% da exportación de gas, que alcanzou os 604,6 millóns.
En Galicia, o sector que máis exportacións rexistrou entre xaneiro e outubro de 2025 foi o de manufacturas de consumo, con 6.913 millóns, seguido do automobilístico, con 5.755 e o de bens de equipo con case 3.986.
En canto o desglose de sectores por provincias, A Coruña concentrou o seu maior volume de negocio exterior nas manufacturas de consumo, con 6.583 millóns de euros, seguidas do sector da alimentación, bebidas e tabaco, que alcanzou os 1.231,9 millóns. En Pontevedra, destacaron especialmente o sector do automóbil, con exportacións por valor de 5.657 millóns, e o de bens de equipo, con 3.063 millóns.
Pola súa parte, en Ourense sobresaíron as semimanufacturas non químicas, con 269 millóns, e a alimentación, con 256 millóns, e Lugo, cuxos principais sectores exportadores foron as materias primas, con 148,5 millóns, e a alimentación, con 143,3 millóns.
