O Goberno, “optimista” co proxecto de SAIC para Ferrol, pide “paciencia” pola súa complexidade

O secretario de Estado de Industria, Jordi García Brustenga, mostrouse confiado de que o proxecto de SAIC para a instalación dunha fábrica de automóbiles en Ferrol chegue “a bo termo”, tras as últimas polémicas arredor da súa proximidade con instalacións do sector da defensa na cidade portuaria.

“Xa veremos como acaba, pero son optimista tanto con este proxecto como con outros que hai enriba da mesa. É moi complexo e temos que ter paciencia, pero vai chegar a bo termo”, afirmou o secretario en declaracións aos medios antes da súa intervención na 40 edición do ‘Encontro da Economía Dixital e as Telecomunicacións’ de Ametic.

O suposto espionaxe

O pasado agosto trascendeu a existencia de informes de Defensa e os servizos de intelixencia que alertaban do suposto risco de espionaxe por parte de SAIC á seguridade nacional debido á proximidade entre o lugar onde se situaría esta nova fábrica e o arsenal militar de Ferrol e o estaleiro de Navantia, no que se traballa con sistemas militares estadounidenses.

Con todo, o Goberno xa negou que poida chegar a rexeitarse esta inversión, que require a aprobación do Consello de Ministros, por motivos de seguridade e sinalou que se estaban a analizar todas as “implicacións” que conleva. “Estas inversións son analizadas e pode pasar que haxa unha serie de recomendacións, desde o punto de vista económico ou da seguridade, que se atenden e fan viable a operación”, indicou na súa altura o ministro de Transformación Dixital e Función Pública, Óscar López.

“Culturas diferentes”

Neste sentido, Brustenga apuntou este martes que as inversións chinesas veñen “con moita présa” pero en Europa trabállase para facer “ben as cousas”, polo que invitou a ter paciencia e ver se o proxecto de SAIC afecta á infraestrutura de defensa e se ten outras implicacións de tipo económico, como a súa capacidade para incentivar o tecido empresarial e o emprego da zona.

“Estamos a aprender a traballar coas inversións chinesas, non é fácil adaptarse a culturas diferentes. Hai que camiñar todos os pasos. Estamos aliñados coas distintas administracións e somos optimistas ante o proxecto que chega a un sector sensible en España“, resumiu.