Unanimidade no Parlamento galego para impulsar o centro europeo de I+D en recursos humanos da Coruña
A posta en marcha do Centro Europeo de Referencia en I+D en materia de Recursos Humanos, impulsado pola ERLAC, posibilitará dotar este campo dun núcleo de investigación relevante e afondar na gobernanza europea, cunha perspectiva de mellora social a través do emprego e a competitividade.
Pleno do Parlamento galego. Europa Press
Comentarios
O Parlamento galego aprobou no pleno desta mañá co voto a favor unánime de todos os grupos unha declaración institucional de apoio á iniciativa de ERLAC para a creación na Coruña dun Centro Europeo de Referencia en I+D en materia de Recursos Humanos (EUHRIC, polas siglas en inglés).
Na súa declaración, a Cámara cualifica o centro como “unha fonte de talento e vangarda” e subliña a súa futura contribución “á mellora da calidade do emprego, da seguridade e da saúde no traballo, do benestar laboral e da competitividade, con especial atención á inclusión” e no marco dunha visión “europea e conxunta”.
A Fundación Escola Universitaria de Relacións Laborais da Coruña, como impulsora da iniciativa, leva preto de dous anos traballando co horizonte da aprobación e apoio ao EUHRIC por parte da Comisión Europea. O proxecto tamén foi presentado en Bruxelas e alcanzou alianzas internacionais entre as que destacan as do tecido empresarial de Francia e Portugal. “Respecto da consecución de adhesións, ERLAC continúa a promovelas arredor de catro eixes: institucional, sociedade civil, ámbito académico e campo empresarial”, explican desde a Fundación nun comunicado.
O obxectivo da Fundación é corrixir a carencia actual dun centro de estudo e investigación específico en materia de recursos humanos, prevención de riscos e saúde laboral. A posta en marcha do EUHRIC posibilitará dotar este campo dun núcleo de investigación relevante e afondar na gobernanza europea, cunha perspectiva de mellora social a través do emprego e a competitividade.
Estas áreas maniféstanse cruciais ante os cambios de paradigma que representan a dixitalización e a intelixencia artificial e a súa incidencia nos contornos laborais. Neste senso, a ubicación deste centro europeo na Coruña permitirá aproveitar senllos con a AESIA e a Cidade das TIC.
