A receita da patronal para os aeroportos galegos: intermodalidade e máis frecuencias

O presidente da Confederación de Empresarios de Galicia (CEG) move ficha ante a crise dos aeroportos galegos. Juan Manuel Vieites defendeu este venres que as tres terminais situadas na comunidade deberían presentar un maior grao de complementariedade para poder reforzar a súa competitividade.

Tras manter unha reunión coa conselleira de Vivenda e Planificación de Infraestruturas, Vieites expresou a súa “preocupación” ao entender que Galicia “non se merece esta situación aeroportuaria”.

Neste sentido, o presidente da patronal galega apostou por “tentar a intermodalidade” dos tres aeroportos e lembrou que na última reunión do Comité Aeroportuario creouse un grupo técnico que estudará por que o aeroporto luso de Oporto “é referencia” e os galegos “perden nalgún caso pasaxeiros”.

Para Vieites, un dos puntos a mellorar pasa por “as frecuencias”, argumentando que “non poden saír os destinos nas mesmas frecuencias e nos mesmos horarios”. “Temos que complementar as frecuencias, os destinos, buscar destinos estratéxicos onde o empresariado ten intereses máis que manifestos”, reflexionou antes de recoñecer tamén que “Aena ten que facer os seus deberes”, aínda que “as taxas probablemente non sexa o máis importante, senón que existan frecuencias”.