A Xunta adianta un ano clave para o proxecto de Altri, que ve «inviable» sen conexión eléctrica.

A Xunta véxeno claro: se non hai conexión non hai fábrica de Altri en Palas de Rei. Así o manifestou a conselleira de Medio Ambiente, Ángeles Vázquez, que cre que o próximo ano clarificará o futuro do proxecto da pastera lusa, que recibiu do seu departamento unha declaración de impacto ambiental positiva. Agora, está pendente tamén a Autorización Ambiental Integrada que, segundo indicou Vázquez, resolverase previsiblemente en 2026.

Díxoo a conselleira con todas as cautelas, pois entende que son a empresa e o Goberno central os que teñen a pelota no seu tellado. Se non hai conexión eléctrica garantida a factoría é “inviable” como calquera proxecto industrial, segundo advertiu. “É imposible ter autorización se non hai canal que surta a esta empresa”, engadiu.

A subestación de Altri

As palabras de Ángeles Vázquez remiten a a planificación da rede eléctrica do Goberno, que non incluíu a subestación que necesitaría a fábrica de fibras téxtiles e pasta soluble que pretende establecer Altri en Palas de Rei, un investimento próximo aos 1.000 millóns. A Xunta presentou alegacións e a conselleira de Medio Ambiente lembrou, este martes, que tamén no próximo ano o Executivo estatal terá que adoptar un pronunciamento definitivo ao respecto.

A titular de Medio Ambiente subliñou aos medios durante un acto na sede da Consellería, en Santiago, que desde a Administración autonómica non podería establecer un prazo concreto para a toma desta decisión sobre a empresa portuguesa. “O prazo non llo podería dicir porque supoño que o Goberno central tamén dará o paso necesario nesta nova planificación”, recalcou a conselleira.

Medio ambiente e electricidade

A xuízo de Vázquez, “a parte medio ambiental ten que ir conectada ao resto da viabilidade”, facendo fincapé en que o proxecto da pastelera lusa “sen auga e sen luz non ten lóxica”. “É imposible, non pode funcionar”, zanxou. O proxecto, matizou, “non deixa de ser complexo” e, neste momento, depende “única e exclusivamente” de ter acceso a electricidade. “E por suposto tamén depende de autorización ambiental integrada”, pero estes dous elementos, “hai que casalos”.