Un máster apoiado por Lactalis, o maior grupo lácteo en España, ensina a producir o leite do futuro

A Universidade de Santiago de Compostela abriu o prazo de preinscrición para o máster en Produción de Leite, que conta co respaldo de Lactalis, o maior grupo lácteo que opera en España e o que máis produto recolle en Galicia.

Nun comunicado, a compañía anima a estudantes, mozos titulados e profesionais do ámbito agrogandeiro a aproveitar a oportunidade formativa que supón este máster, cunha duración de dous anos, 60 créditos ECTS e enfoque presencial. A preinscrición poderá realizarse ata o 23 de agosto e o período de matrícula será entre o 24 de agosto e o 4 de setembro.

“Desde Lactalis España anímase a todos aqueles perfís con interese en desenvolver a súa carreira profesional no sector lácteo a valorar esta formación, concebida para responder ás necesidades reais dunha actividade cada vez máis tecnificada, innovadora e esixente”, di a multinacional francesa.

Que ofrece

A produción láctea atópase nun proceso de transformación marcado pola incorporación de novas tecnoloxías, a mellora da sustentabilidade, a optimización de recursos e a necesidade de atraer novas xeracións de profesionais cualificados. Neste contexto, o Máster en Produción de Leite proporciona unha visión completa da cadea de valor do sector, abordando áreas clave como a reprodución e sanidade animal, a calidade do leite, o benestar animal, as instalacións gandeiras, a alimentación, a produción de forraxes e a xestión técnica e económica das explotacións.

A formación desenvolverase principalmente na Escola Politécnica Superior de Enxeñaría de Lugo e nas instalacións do Laboratorio Interprofesional Galego de Análise de Leite (LIGAL), dúas entidades de referencia en investigación, innovación e coñecemento aplicado ao sector lácteo.

As persoas interesadas poden consultar toda a información e formalizar a súa solicitude a través da páxina web da Universidade de Santiago de Compostela.