Nestlé vende o 50% do seu negocio de augas ao dono de Iberconsa por 3.000 millóns tras outra caída dos beneficios
A multinacional que preside Pablo Isla pecha o primeiro semestre do exercicio cun recorte dos ingresos e dos beneficios, que retroceden un 31,5%.
Comentarios
Nestlé acordou a venda do 50% do seu negocio de augas e bebidas premium a Platinum Equity, o fondo que controla a pesqueira galega Iberconsa. A multinacional suíza e o fondo de investimento crearán unha joint venture denominada Peranel, que contará con máis de 30 marcas e unha rede de distribución en 120 países. Á fronte estará Muriel Lienau, actual conselleira delegada desta división en Nestlé.
A operación péchase por algo máis do esperado, pois a compañía que preside Pablo Isla recibirá aproximadamente 3.000 millóns de euros unha vez se complete a transacción, o que está previsto para o primeiro semestre de 2027. O expresidente de Inditex asina a súa primeira gran desinversión desde que foi nomeado presidente da multinacional suíza, nunha venda que leva tempo sobre a mesa da cúpula directiva.
“Grazas a un maior enfoque, estará ben preparada para impulsar as súas ambicións de crecemento a longo prazo, fortalecendo esta carteira única de marcas internacionais e locais, con investimentos continuos en innovación, ‘premiumización’, excelencia operativa e sustentabilidade”, dixo Philipp Navratil, CEO de Nestlé.
Caída de vendas e beneficios
A operación colle á compañía en proceso de reestruturación e con ingresos e beneficios á baixa. Os resultados presentados este venres amosan un beneficio neto atribuído de 3.472 millóns de francos (3.742 millóns de euros) no primeiro semestre, o que representa unha baixada do 31,5% en comparación coas ganancias do primeiro semestre de 2025. O resultado da compañía de alimentación viu afectado por gastos de reestruturación de arredor de 800 millóns de francos suízos (862 millóns de euros) ademais da depreciación non monetaria de 1.300 millóns de francos (1.400 millóns de euros) pola reclasificación de negocios como “activos mantidos para a venda”.
Da súa banda, a cifra de negocio de Nestlé no primeiro semestre retrocedeu un 2,5% interanual, ata 43.109 millóns de francos (46.460 millóns de euros), debido ao efecto negativo do tipo de cambio, incluíndo 21.792 millóns de francos (23.486 millóns de euros) entre abril e xuño, un 0,8% máis que un ano antes. Na comparativa orgánica, que exclúe o cambio de moeda e as variacións de perímetro da empresa, os ingresos semestrais aumentaron un 3,6%, incluíndo 1,5 puntos porcentuais de crecemento interno e 2,1 en relación cos prezos.
Menos ingresos en Nespresso e a auga
Por mercados, as vendas de Nestlé en América caeron un 3% na primeira metade de 2026, ata 18.646 millóns de francos (20.096 millóns de euros); en Asia Oceanía e África diminuíron un 3,8%, ata 10.366 millóns de francos (11.172 millóns de euros); e un 0,5% en Europa, con 9.044 millóns de francos (9.747 millóns de euros).
Doutra banda, Nestlé indicou que as vendas de Nespresso no primeiro semestre sumaron 3.147 millóns de francos (3.392 millóns de euros), un 0,8% menos que un ano antes, mentres que a facturación do negocio de augas, obxectivo do acordo con Platinum, foi de 1.781 millóns de francos (1.919 millóns de euros), un 2,3% menos.
“Estamos incrementando e priorizando o noso investimento nas nosas marcas líderes e plataformas de crecemento, optimizando o enfoque da nosa carteira e impulsando unha maior eficiencia para reinvestir”, comentou Philipp Navratil, conselleiro delegado de Nestlé. “Aínda que o entorno externo segue sendo incerto, estamos tomando medidas para acelerar un crecemento sostido”, engadiu.
