Nestlé saca peito polo acordo para o ERE en España e comezará co plan de saídas en xullo
A compañía presidida por Pablo Isla asegura que o plan de axuste adoptado “xenerará un modelo máis eficiente e áxil a longo prazo”.
Pablo Isla foi nomeado novo presidente do consello de administración de Nestlé en outubro de 2025. Fotos de arquivo: EFE e Nestlé.
Comentarios
Nestlé España acordou un pacto cos representantes dos traballadores polo que reduce o plan de axuste plantexado en distintas fábricas e centros do país, que afectará a 242 empregados fronte á proposta inicial de suprimir 301 postos de traballo. Os sindicatos xa anunciaran o pacto a pasada semana, pero este luns, a multinacional, presidida a nivel global, emitiu un comunicado no que explica que o ERE en marcha lle permitirá afrontar a evolución do sector cun modelo “máis eficiente e áxil” e xerar “valor a longo prazo”.
As saídas ligadas ao ERE acometeranse de inmediato, xa que “executaranse principalmente a finais de xullo deste ano e en marzo de 2027”. “Tamén se contempla unha xanela de saídas en decembro de 2026 como parte do plan de recolocacións internas”, explica.
Condicións económicas pactadas
A división española da multinacional asegura que a negociación “permitiu reforzar as condicións económicas” coas que saírán os traballadores afectados polo axuste. Informa de que terán indemnizacións de 45 días por ano traballado ata un máximo de 32 mensualidades para os menores de 54 anos, ou de 54 anos con menos de cinco anos de antigüidade. Para o resto de empregados afectados, ata os 63 anos, “contempla a opción dun plan de rendas”. Ademais, “en ambos os casos incorpóranse incentivos vinculados á idade e á antigüidade na empresa”.
Ademais, indica que “co obxectivo de minimizar o impacto, o acordo abre a voluntariedade para quen queira acollerse ás saídas coas condicións do expediente e inclúe un conxunto de medidas sociais, como un plan de recolocacións voluntarias”.
O pacto coa parte social inclúe a creación dunha “bolsa de traballo que dará prioridade ás persoas afectadas no acceso ás vacantes que poidan crearse na compañía ata o 31 de decembro de 2027, ás que se lles ofrecerá acompañamento específico”.
Modelo “máis eficiente e áxil”
A compañía asegura que “abordou o proceso con profunda conciencia do impacto nos traballadores e nas familias”. O recorte en España forma parte dun plan a nivel global que conleva a saída dun 6% da plantilla, 16.000 empregados a nivel global.
Defende Nestlé España que “o acordo permite á compañía seguir avanzando na súa transformación operativa, adaptándose aos distintos retos do mercado en España, asegurando a viabilidade do negocio para seguir xerando valor a longo prazo”. Asegura que, así, “afrontará a evolución do sector cun modelo máis eficiente, áxil e focalizado nas súas marcas estratéxicas”.
