A Xunta invita a Metaldeza, da familia Cuiña, a entrar no sector da defensa
A conselleira de Economía, María Jesús Lorenzana, di que a súa especialización no deseño, fabricación e montaxe de construcións metálicas lle permitiría contribuír á cadea de subministración da industria da defensa.
A conselleira de Economía, María Jesús Lorenzana, camiña xunto a Olalla Cuiña e Ramón Cuiña nas instalacións de Metaldeza.
Comentarios
A Xunta invita a Metaldeza, unha das empresas da familia Cuiña, a entrar no sector da defensa, aproveitando o incremento do investimento público nesta área. A conselleira de Economía, María Jesús Lorenzana, avaliou xunto cos responsables da compañía, entre eles o presidente, Ramón Cuiña, e a vicepresidenta, Olalla Cuiña, esta posibilidade, ao entender que a súa especialización no deseño, fabricación e montaxe de construcións metálicas lle outorga capacidade para formar parte da cadea de subministración da industria de defensa.
Lorenzana visitou este venres no polígono de Botos, en Lalín (Pontevedra), a sede desta empresa, buque insignia da familia xunto a Inasus. Alí puxo en valor que Metaldeza, con 40 anos de traxectoria, “conta cos tres elementos básicos para que exista unha fórmula de éxito”, que son a internacionalización, a innovación e a diversificación, porque soubo introducirse en todo tipo de sectores: industrial, mineiro, enerxético, entre outros. Nesta liña, explicou que a vontade da Xunta é traballar agora conxuntamente coa empresa para axudalos a dar o salto ao sector da defensa.
“Creemos que é un exemplo de empresa que podería entrar” neste ámbito, dixo, polo que na reunión vanse avaliar “as posibilidades que poden ter dentro dos mecanismos que ten a Iniciativa Estratéxica de Seguridade, Defensa e Aeroespazo (IESDA)”, que vai mobilizar ata 2030 máis de 900 millóns de euros, lembrou. “Agora mesmo existen unha trintena de empresas que xa están a traballar en Galicia no sector da defensa e a seguridade pero pensamos que podemos chegar a máis de cen”, abondou.
No marco desta estratexia, Lorenzana quixo lembrar que aínda está aberta ata o próximo 13 de maio a liña de axudas da Xunta para certificacións, que xa leva consumido o 80 % do crédito, que é de 1,5 millóns de euros. Cobre a primeira inscrición no Rexistro Xeral de Armamento e Materiais (DGAM); a implantación de sistemas de xestión da calidade; a homologación de sistemas ou produtos; as autorizacións de seguridade ante o CNI; e o asesoramento en proxectos para participar en convocatorias nacionais ou europeas.
“É unha maneira de acompañar ás empresas galegas que non son deste sector -dixo-, para que poidan entrar neste mundo que ten moitísimas posibilidades para elas polo potencial industrial e tecnolóxico que xa temos”, concluíu.
