Amancio Ortega (Inditex) e Bernard Arnault (LVMH) caen en Forbes, que queda sen europeos entre os dez máis ricos
LVMH, o imperio do luxo de Bernard Arnault, cae un 30% na bolsa no que vai de ano, bastante máis que Inditex, que se deprecia un 10%; Amancio Ortega está máis preto de volver a ser o europeo máis rico, pero afástase das maiores fortunas do mundo.
Amancio Ortega e Bernard Arnault coa lista Forbes de fondo
Comentarios
Ao peche da xornada bursátil deste mércores, cos principais mercados europeos en negativo, produciuse unha situación inédita na última década. A lista Forbes dos máis ricos do mundo non contaba entre as dez maiores fortunas con ningún europeo. O último integrante do top ten, o francés Bernard Arnault, padecía outra mala sesión de LVMH, cuxos títulos se depreciaron un 1,39%, acumulando xa unha caída do 30% no que vai de ano. A publicación norteamericana restou 1.800 millóns ao patrimonio do presidente do grupo propietario de Louis Vuitton, Sephora ou Dior. Con ese recorte, Arnault caeu ao posto 11 dos máis acaudalados do mundo, superado polos propietarios de Wallmart, Rob e Jim Walton, e por momentos tamén por Warren Buffett, que ao peche desta edición ocupaba o posto 12 no ranking de Forbes.
A pesar de que Inditex resiste mellor que o imperio do luxo as consecuencias do conflito en Oriente Medio, Amancio Ortega tampouco navega cos dez maiores patrimonios do mundo. Cando os mercados europeos baixaron a persiana, o fundador e máximo accionista do xigante téxtil estaba no posto 15 da lista, cunha fortuna estimada en 114.000 millóns, despois de que a multinacional galega retrocedese un 0,7% no Ibex. No que vai de ano, as accións de Inditex se deprecian un 10%.
Sen Arnault e sen Ortega, a lista Forbes deixa unha fotografía sorprendente, orfa de representantes do Vello Continente no top ten das maiores fortunas. A publicación mide os grandes patrimonios mundiais desde 1987, pero non o fixo en tempo real, ou cando menos non ofreceu esa información diaria, ata hai só uns anos. En consecuencia, é difícil saber cando foi a última vez que se produciu este escenario ou canto se repetiu ao longo do tempo.
O certo é que desde hai 40 anos sempre existiron grandes patrimonios europeos nos postos altos da lista: a familia Rausing, do imperio de Tetra Pak, nos anos oitenta e noventa; Paul Sacher e Maja Hoffmann, da farmacéutica Hoffmann-La Roche, tamén nos noventa; os fundadores de Aldi, Karl e Theo Albrecht, a comezos do novo século; aos que tomaría o relevo Ingmar Kamprad, o fundador de Ikea; a partir de 2010, Liliane Bettencourt, accionista de L’Oreal; Bernard Arnault e Amancio Ortega foron fixos nos postos cabeceros da lista dos máis ricos, con algunha aparición máis fugaz de Stefan Persson, fillo dos fundadores de H&M.
Ademais da ausencia de europeos, outro feito inusual é que as 10 persoas máis ricas do mundo este mércores eran todas estadounidenses, lideradas por Elon Musk, cunha fortuna de máis de 775.000 millóns de dólares.
Arnault perde 35.000 millóns en seis meses
O luxo é tradicionalmente un valor refuxio ante inestabilidades económicas, pero nos últimos anos sufriu un pertinaz declive agora agravado pola guerra en Irán. Bernard Arnault os sofre cos números na man. A fortuna do presidente de LVMH ascendía a 183.000 millóns de dólares en novembro do ano pasado. Seis meses despois, ao peche de abril, reduciuse a 141.300 millóns. Polo camiño deixou 35.000 millóns de euros de patrimonio. Outros grupos do sector como Kering ou Hermès perden máis do 23% en bolsa en 2026. O declive das vendas ás grandes fortunas do Golfo ou o impacto no turismo en mercados relevantes, como China, prexudicaron ao sector.
No caso de LVMH, deixou claro o impacto do conflito en Oriente Medio no avance dos seus resultados no primeiro trimestre. A cifra de negocio do xigante francés retrocedeu un 6%, ata 19.121 millóns. O grupo apuntou nun comunicado que, en base aos seus cálculos, o ataque de Israel e Estados Unidos a Irán, que se produciu o 28 de febreiro, restou aproximadamente un 1% de crecemento nos tres primeiros meses do ano.
