Apoio de 133 millóns para o proxecto de hidróxeno de Repsol na Coruña tras as renuncias de Iberdrola
O proxecto, denominado Atlas Electrolyser Plant e que pasa por substituír o hidróxeno gris que produce actualmente a refinería coruñesa, contempla a construción dun electrolizador cunha potencia de 50 megavatios en Arteixo.
Refinería de Repsol na Coruña – Arquivo
Comentarios
Alfombra de ouro en forma de millóns para o gran proxecto de Repsol na refinería da Coruña. O Instituto para a Diversificación e Aforro Enerxético (IDAE) propuxo conceder á compañía petrolífera unha subvención máxima de 133 millóns de euros para desenvolver unha planta de produción de hidróxeno renovable que se instalará no complexo industrial da compañía en Bens.
O proxecto, denominado Atlas Electrolyser Plant, contempla a construción dun electrolizador de tecnoloxía PEM cunha potencia de 50 megavatios en Arteixo. O seu obxectivo será producir hidróxeno renovable para substituír o gris, obtido actualmente a partir de combustibles fósiles, nos procesos de refino e outras actividades industriais do complexo de Repsol da Coruña.
Inxeccións
A instalación prevé acadar unha produción acumulada susceptible de recibir axuda de 60.634 toneladas de hidróxeno renovable durante dez anos. O incentivo calculouse cunha prima de 2,2 euros por quilo de hidróxeno producido.
A proposta de resolución definitiva do IDAE fixa a axuda máxima en 133,39 millóns de euros, financiados a través do Plan de Recuperación, Transformación e Resiliencia e dos fondos europeos Next Generation.
As renuncias de Iberdrola
O proxecto Atlas de Repsol accedeu á financiación despois de que Iberdrola desistise das solicitudes correspondentes aos proxectos Noon II e Odin. Esta renuncia permitiu incorporar á lista de proxectos seleccionados a Atlas e a Puertollano Hidrogen Network, ambos promovidos pola filial Repsol Renewable and Circular Solutions.
O proxecto terá un prazo máximo de 60 meses para entrar en operación desde a publicación da resolución favorable. Ademais, Repsol deberá obter a autorización ambiental integrada nun prazo de 24 meses e adoptar a decisión final de investimento nun máximo de 30 meses. Repsol deberá xustificar semestralmente a produción de hidróxeno verde durante un período de dez anos.
