Copo multiplica a súa facturación tras asegurar o seu futuro en Galicia, mais os seus beneficios redúcense seis veces

Contrastes para o Grupo Empresarial Copo despois de selar a súa permanencia en Galicia. O principal provedor galego do sector da automoción con capital autóctono publicou este xoves o seu Estado de Información Non Financeira (EINF) correspondente ao exercicio fiscal de 2024, onde logrou superar os 200 millóns de euros en facturación.

Segundo a documentación presentada, a súa cifra de negocio aumentou dende os 189,9 millóns de euros en 2023 ata alcanzar os 209 millóns. Este aumento do 10% ocorreu un ano despois de que a empresa fixera as paces coa Comunidade de Montes de Tameiga e asinase un novo contrato para garantir a continuidade da súa actividade en Mos ata, polo menos, o ano 2050.

Foco nas marcas ‘premium’

A empresa, especializada na fabricación de compoñentes para o interior de vehículos, tales como espumas e recheos para os asentos, así como pezas en polipropileno e poliuretano para funcións de insonorización, conta entre os seus principais clientes a Volkswagen, Peugeot, Citroën, Mercedes, General Motors, Renault, Audi ou Skoda.

Volkswagen representa un 36% da súa facturación, unha cifra que duplica o 18% que xera o xigante Stellantis, que ten en Balaídos un dos seus principais centros de produción (produciu 516.050 vehículos o ano pasado).

Ademais, como indica a compañía no seu último EINF, “está consolidándose como provedor no mercado das marcas ‘premium’. Ademais de participar no deseño, desenvolvemento e fabricación dos asentos para o Ferrari SF90 Stadale, Copo incorporou tecidos nos vehículos de BMW e comezou a introducir o tecido calefactado en Maserati.

A ‘pegada’ de Copo

Grupo Empresarial Copo conta con tres centros de traballo entre Mos e Porriño, onde alberga a Copo Ibérica, o Cetec, Copo Galicia ou Compone…