Delikia, o xigante galego do ‘vending’, supera os 70 millóns en ingresos e duplica beneficios

A operadora viguesa de vending Delikia Fresh pechou o 2025 cunha facturación de 70,06 millóns de euros, un 20% por riba dos 58,65 millóns do ano anterior. A compañía cumpre as súas previsións e mantén a folla de ruta para acadar os 100 millóns en ingresos en 2028. 

“O incremento da cifra de negocios é consecuencia tanto do incremento da actividade produtiva como da inversión realizada polo grupo para captar novos clientes”, explica a memoria que acompaña as contas de Maxelga 93 (sociedade que está tras a compañía) depositadas no Rexistro Mercantil e consultadas por Economía Dixital Galicia a través da solución analítica Insight View. 

Segundo explican os xestores, as vendas realizadas a través da aplicación Delikia incrementáronse un 23,71% tras “unha mellora constante por ter uns sistemas de pago máis eficientes, para que calquera usuario poida utilizar o servizo dispensando nos diferentes puntos de venda a través de pagos dixitais”. 

En canto á estratexia comercial seguida pola compañía no pasado exercicio, o informe sinala “a captación de clientes encadrados cuxa actividade se vexa minimamente afectada polas situacións económicas derivadas das crises globais dentro da UE”, sendo os sectores loxísticos, gran distribución, farmacéutico, sanitario e tecnolóxico os que experimentaron un crecemento máis destacado.

O resultado de explotación da compañía, propio da actividade da empresa, incrementouse case un 50% ao pasar dos 1,87 millóns aos 2,78. “Analizando as partidas máis significativas que o compoñen, vemos que os gastos de persoal incrementáronse un 13,21%; os gastos de explotación incrementáronse un 23,22% e as dotacións para a amortización do inmobilizado incrementáronse un 7,03%”. En canto aos beneficios, a compañía pasou dos 671.000 euros a case 1,4 millóns, máis do dobre. 

Como feitos posteriores ao peche do exercicio, o informe sinala que se produciu a captación de novos clientes como as residencias xeriátricas, por todo o territorio nacional, de DomusVi; o Campus de Lugo da Universidade de Santiago; diferentes plataformas do Grupo Carreras; e os lotes 1 e 2 do concurso adxudicado pola Axencia Madrileña de Atención Social (AMA). 

O negocio de Delikia

Delikia iniciou a súa actividade en 1990. Actualmente opera a nivel nacional, con presenza en gran parte de España, tanto na península como nas illas. A compañía dispón de preto de 30 instalacións, entre delegacións, almacéns loxísticos e dous obradoiros situados en Vigo e Madrid.

Ademais de en Galicia, a compañía conta con delegacións e instalacións en cidades como Barcelona, Madrid, Valencia, Vitoria, Sevilla e Mallorca, onde se atopan as súas principais delegacións. Así mesmo, dispón de instalacións en Gran Canaria, Tenerife, Murcia, Alicante, Tarragona, Córdoba, Xixón, Huelva, Cádiz, Mérida e Toledo, entre outras localidades. 

O negocio de Maxelga 93 distribúese en catro sociedades. A primeira é Delikia Fresh Factory, que concentra a actividade do vending. A segunda é Saboresse SL, empresa xurdida en 1999 en Vigo, nun obradoiro no que se fabricaban os produtos frescos que logo se vendían nas máquinas vending. 

En 2012 a actividade da empresa profesionalizouse abrindo un segundo obradoiro en Madrid, algo que permitiu á compañía “levar os produtos frescos a todas as delegacións do territorio nacional”. Na actualidade Saboresse conta cunha plantilla de máis de 30 profesionais “e un sistema de produción optimizado para garantir eficiencia e calidade”. 

Ás elas súmanse Deleuska SL, dedicada tamén á explotación de máquinas expendedoras de alimentos e bebidas, e Neurona Galicia 2018, cuxo obxecto social é todo o relacionado con sistemas e procesos dixitais que se vinculen directamente ás funcións compostas dos smartphone como ferramentas de recollida, captación, control, revisión, big data, estatísticas, telemetría, analítica, gráficas, tendencias e promocións.