Do CTAG ao ITG: os centros tecnolóxicos galegos rozan os 118 millóns de facturación

A Xunta de Galicia pon números ao negocio dos centros tecnolóxicos galegos. O conselleiro de Educación, Román Rodríguez, foi o encargado de levar a cabo este mércores a presentación de resultados de Aimen, Anfaco-Cytma, Cetim, CTAG, Gradiant e ITG, que pecharon 2028 con uns ingresos conxuntos de 117,8 millóns de euros.

Estas entidades que conforman a Alianza Tecnolóxica Intersectorial de Galicia (Atiga) “reforzan o seu papel fundamental no avance da Galicia Calidade” tras acadar 33 millóns en convocatorias nacionais e autonómicas e 16 millóns en fondos europeos ao longo de 2025.

Durante o acto, Román Rodríguez resaltou a capacidade dos centros tecnolóxicos galegos para captar fondos en convocatorias altamente competitivas a nivel europeo, nacional e autonómico. Ademais, subliñou o papel destes axentes na dinamización da innovación empresarial, colaborando como socios do tecido produtivo en proxectos estratéxicos.

Ademais do impacto económico dos centros tecnolóxicos integrados en Atiga, contribúen ao desenvolvemento social, dando emprego a preto de 1.900 persoas de 36 nacionalidades, con máis de 500 proxectos de I+D+i cada ano.

Por último, o conselleiro sinalou a contribución destes centros “á internacionalización da I+G+i“, aumentando o seu peso entre as entidades galegas no programa marco de I+D+i comunitario e situando a Galicia como líder en España nos retornos obtidos en ámbitos como industria e mantemento e ocupando unha posición destacada en temáticas como seguridade civil.

Neste sentido, co obxectivo de fomentar a transferencia de tecnoloxía ao tecido produtivo e a internacionalización da I+G+i, a Xunta leva colaborando con Atiga desde 2015, a través de convenios que suman un apoio de 1 millón. Ademais, leva apoiado con máis de 200 millóns de euros desde 2009 aos centros tecnolóxicos que conforman esta alianza.

Un cuarto da financiación europea para Galicia

Ao nivel europeo, estas entidades captaron máis de 50 millóns de euros no marco do programa Horizonte Europa entre os anos 2021 e 2025. Representan o 26,6% da financiación europea captada por Galicia, reforzando a súa posición como motor de internacionalización e transferencia tecnolóxica da comunidade.

Como exemplos dos avances dos centros tecnolóxicos, Aimen coordinou desde O Porriño o proxecto europeo Caelestis para avanzar cara unha aviación máis limpa e con menores emisións. Anfaco-Cytma desenvolveu en Vigo o primeiro prototipo industrial para a produción intelixente de microalgas e CETIM, situado en Culleredo, validou en distintas zonas de Europa tecnoloxía propia para mitigar os efectos do cambio climático no ciclo da auga.

Por outra banda, o CTAG, centro situado en O Porriño, impulsou un servizo piloto de shuttle autónomo e eléctrico como solución de mobilidade intelixente no Campus de Vigo e Gradiant, situado en Vigo, liderou Blossom, un proxecto orientado ao deseño de sistemas fotónicos autónomos, ultraeficientes e de baixo consumo, con aplicación directa en intelixencia artificial, telecomunicacións e sector aeroespacial.

ITG desenvolveu desde A Coruña para Abanca unha solución avanzada de prevención de incendios forestais baseada en hangares robotizados con drons autónomos e instalada en tres puntos críticos de Galicia con elevado risco de incendios.