Inditex, Naturgy e Finsa irrumpen no patronato do centro tecnolóxico galego ITG

Operación de calado para o centro tecnolóxico ITG. A entidade que desde o ano 2015 preside Antonio Couceiro anunciou a incorporación de Inditex, Naturgy e Finsa ao seu patronato.

“A súa entrada supón un importante reforzo ao ecosistema de innovación e excelencia tecnolóxica que impulsa ITG co obxectivo de mellorar a competitividade de pequenas e medianas empresas, así como acompañar a empresas punteiras no desenvolvemento de solucións innovadoras”, destaca o Instituto Tecnolóxico Galego a través dunha nota de prensa.

“A entrada de tres grandes compañías como Finsa, Inditex e Naturgy é un paso decisivo na nosa misión de transformar a tecnoloxía en solucións reais para a industria e a sociedade. O seu compromiso demostra a confianza do sector privado na aportación de valor diferencial e de competitividade que é a nosa razón de ser”, engadiu Carlos Calvo Orosa, director xeral de ITG.

E é que este movemento permite que ITG consolide o seu papel como polo tractor da I+D+i en Galicia e en España, “reforzando a súa capacidade para crear sinerxías que dean resposta aos grandes retos da sociedade: dixitalización, sostibilidade, enerxía, mobilidade e competitividade industrial”, segundo reivindica a entidade.

O bagaxe de ITG

Inditex, Naturgy e Finsa únense a un patronato no que actualmente están representados os Colexios Oficiais de Enxeñeiros Industriais de Galicia, de Arquitectos, de Camiños, Canais e Portos, de Minas, Navais e Agrónomos; a Confederación de Empresarios de Galicia; as universidades de A Coruña, Santiago de Compostela e Vigo; e a Xunta de Galicia.

O movemento supón un salto de calidade para o ITG, que é o único centro en España co cuádruple recoñecemento de excelencia investigadora Cervera en Intelixencia Artificial (IA), computación cuántica, transición enerxética e mobilidade intelixente. O Instituto Tecnolóxico de Galicia está tamén certificado no seu sistema de xestión da calidade, da seguridade da información e de xestión da I+D+i, está acreditado tamén por ENAC para a certificación de persoas e ten como principal fonte de ingresos a venda de solucións tecnolóxicas ao mercado, que supón un 62% do total.

“A participación de ITG en iniciativas de I+D de primeiro nivel en Europa supón o 38% restante dos seus ingresos”, destaca a firma, que apunta como fitos recentes “a creación da primeira rede privada de comunicacións con seguridade cuántica do noroeste español, a xestión intelixente da enerxía en infraestruturas singulares como a plataforma oceánica en alta mar do Goberno de Canarias ou o desenvolvemento de IA predictiva para grandes compañías do sector lácteo ou cárnico”.

ITG tamén pon en valor o “impulso da loxística sanitaria non tripulada en hospitais como o de La Paz en Madrid ou o de A Coruña, ou o desenvolvemento da plataforma U-space máis probada e validada actualmente en Europa para a xestión integrada e segura do tráfico de drons”.

A entidade conta con 190 profesionais en plantilla e sumou 15 novas incorporacións de perfís de alta cualificación ao longo deste 2025.