DomusVi: refinanciamento de débeda e venda de xeriátricos para salvar ao rei das residencias

DomusVi, o maior grupo de residencias da terceira idade que opera en España, aproveitou o verán para endereitar as súas finanzas, afectadas pola elevada débeda e pola crise xerada polo Covid. A pandemia non só xerou números vermello no grupo que absorbeu á antiga Geriatros das caixas galegas, con perdas de 95 millóns antes de impostos só no negocio español entre 2020 e 2022. Tamén provocou unha forte crise de reputación pola morte de anciáns nos seus centros. Foi neste período crítico cando Josefina Fernández deixou a empresa para ceder o relevo a José María Pena, o actual conselleiro delegado do grupo en España.

Neste escenario adverso, a multinacional conseguiu fortalecer o seu castigado balance mediante a venda de xeriátricos e o aprazamento de débeda. O 28 de xuño, a compañía logrou un dos obxectivos fixados no seu plan estratéxico ata 2025 e aprazou o vencemento de 1.854 millóns de débeda ata finais de 2029. Trátase de financiamento préstamo a prazo B reembolsable ao vencemento, segundo comunicou o grupo. Adicionalmente, tamén renovou 181 millóns en liñas de crédito, de tal maneira que a reestruturación financeira superou conxuntamente os 2.000 millóns.

O movemento veu acompañado do respaldo dos dous accionistas de DomusVi, o millonario francés Yves Journel e o fondo de investimento ICG. Ambos comprometeron uns 200 millóns para reforzar o capital do grupo, que emprega a uns 50.000 profesionais.

En España, ao peche do exercicio de 2022, tiña 173 residencias e centros de día, aos que se sumaban 15 centros de atención á saúde mental, seis centros especializados en discapacidade e dous complexos de apartamentos. A actividade da compañía, que se completaba con servizos de atención ao fogar, xerou aquel ano 749,2 millóns en ingresos.

Venda de residencias

A outra pata da estratexia de DomusVi para reforzar as súas finanzas son as desinversións. Segundo avanzou Expansión o pasado abril, o grupo encargou a KPMG a venda da súa división de saúde mental, coa que esperaba conseguir algo máis de 100 millóns. O traspaso de Mentalia Salud coincide cunha batería de operacións de venda das súas residencias mediante a fórmula de leaseback, que lle permite continuar xestionando os centros con normalidade.

Pouco antes de selar o aprazamento de débeda, o rei das residencias anunciou o traspaso de 11 inmobles en España a Romano Senior por 92 millóns de euros. Os xeriátricos traspasados suman unhas 1.400 prazas e dous deles ubícanse en Galicia, en Narón e Vigo. O resto repartíanse entre País Vasco, Andalucía, Cataluña, Madrid e Murcia.

Esta operación sumouse á realizada a finais de 2023, cando vendeu á xestora de fondos luxemburguesa Threestones Capital Management outros cinco centros, entre eles, as residencias de Noia, Cangas e Lalín. A propia DomusVi indicaba, respecto ao acordo con Romano Senior, que estaba “en liña con outras operacións inmobiliarias conducidas previamente polo grupo”. É parte da xestión activa que DomusVi realiza regularmente para a optimización e a eficiencia da súa importante carteira inmobiliaria”, engadía.

Outra destas vendas produciuse tamén en 2023, co traspaso de cinco centros ao fondo APG por 36,5 millóns, incluíndo a súa residencia de Oleiros (A Coruña).