Dúas consultoras galegas de enxeñería, investigadas polo presunto amaño de contratos públicos.
A Competencia investiga 11 consultoras de enxeñaría, entre elas a filial galega de Applus e iPlan, con domicilio en Santiago, pola posible manipulación de licitacións públicas de diversas administracións, entre elas, o Ministerio de Transportes.
A presidenta da CNMC, Cani Fernández Vicién, durante a primeira xornada do Forbes Spain Economic Summit 2025. A. Pérez Meca / Europa Press
Comentarios
A Comisión Nacional dos Mercados e a Competencia (CNMC) abriu un expediente sancionador a 11 consultoras de enxeñaría polo posible amaño de concursos públicos. A entidade que preside Cani Fernández investiga se as empresas manipularon licitacións mediante acordos e intercambios de información sensible. Entre as empresas investigadas están a filial galega de Applus, Applus Norcontrol, con sede na Coruña. Tamén iPlan Mobilidade, con domicilio social en Santiago. Esta firma ten como administradores a Antonio Bejarano e a Guillermo Maldonado, que é tamén conselleiro delegado de Tema, outras das empresas investigadas no expediente.
As indagacións afectan tamén a Prointec, filial de Indra e unha das firmas protagonista no deseño da rede de alta velocidade galega; e a Sener, un dos socios do parque de eólica mariña Nordés. O resto de empresas no expediente son Alauda, Ciesm-Intevia, Estudos e Servizos de Mobilidade e Xestión de Infraestruturas (Esmobilidade), Heymo, Incope e TPF Getinsa Euroestudios.
Contratos da Dirección Xeral de Estradas
O regulador explica nun comunicado que estas empresas se repartiron licitacións de consultoría e asistencia técnica de enxeñaría, convocadas por diversos organismos públicos estatais, autonómicos e locais. En concreto, haberían presentado ofertas ficticias de forma concertada.
A Dirección de Competencia da CNMC iniciou este expediente sancionador tras analizar diversas licitacións convocadas pola Dirección Xeral de Estradas do Ministerio de Transportes e Mobilidade Sostible para contratar servizos de consultoría e asistencia técnica en enxeñaría. Engade que a CNMC inspeccionou as sedes de Aecom Spain, Alauda, Prointec, SGS Tecnos e Getinsa (entre o 30 de xaneiro e o 2 de febreiro de 2024), e de Esmobilidade, Heymo, imesAPI e Tema (entre o 25 e o 28 de novembro de 2024).
Ábrese agora un período máximo de 24 meses para a resolución do expediente. A CNMC lembra que a incoación non prexulga o resultado final da investigación.
