Ecoener ‘pesca’ 8 millóns de axudas públicas para renovar catro centrais hidroeléctricas en Galicia
A compañía foi seleccionada na Segunda Convocatoria do Programa de Repotenciación Circular do Instituto para a Diversificación e Aforro da Enerxía (IDAE); a subvención destinarase a modernizar as minicentrais de Xestosa, Landro, Cierves e Peneda.
Hidroeléctrica Ecoener
Comentarios
Ecoener, a empresa coruñesa de enerxía renovable presidida por Luis de Valdivia, conseguiu unha subvención con cargo aos fondos Next Generation para modernizar as minicentrais hidroeléctricas de Xestosa e Landro (Ourol, Lugo), Cierves (Ribadavia, Ourense) e Peneda (A Arnoia, Ourense).
A compañía foi seleccionada na Segunda Convocatoria do Programa de Repotenciación Circular do Instituto para a Diversificación e Aforro da Enerxía (IDAE), no marco do Plan de Recuperación, Transformación e Resiliencia financiado pola Unión Europea a través dos fondos Next Generation EU, segundo recolle a proposta de resolución provisional publicada recentemente.
“Esta subvención fará posible, de xeito pioneiro, incorporar os primeiros sistemas de almacenamento de enerxía en activos hidroeléctricos da compañía, o que contribuirá a unha xestión máis eficiente mellorando a flexibilidade e integración no sistema eléctrico. En concreto, instalarase almacenamento cunha capacidade de 55 megavatios/hora (MWh): 25 MWh na central de Landro, 20 MWh na de Cierves e 10 MWh na de Xestosa”, explican desde a compañía.
Hibridación de activos
A firma coruñesa está a impulsar a hibridación dos seus activos con sistemas de almacenamento. Nas Canarias, por exemplo, a compañía executa actualmente varios proxectos de baterías que suman 77,6 MWh de capacidade. Tamén conta con desenvolvementos similares en República Dominicana, Romanía e Guatemala.
A axuda permitirá a renovación tecnolóxica e medioambiental, así como a redución do impacto ambiental de instalacións cunha potencia conxunta de 30,1 megavatios (MW).
“Estes proxectos de modernización e mellora ambiental reforzan o compromiso de Ecoener coa xeración renovable e a transición enerxética no ámbito rural galego. Estas centrais son un exemplo de integración paisaxística e de máximo respecto polo entorno”, sinalou Luis de Valdivia. A inversión na renovación das minicentrais ascenderá a 21 millóns de euros.
