A filial comercial de Sargadelos eleva as vendas un 11% e supera por primeira vez os nove millóns
Porcelana de Sargadelos pechou 2025 en beneficios e cunha cifra de negocio que se estirou dos 8,2 aos 9,1 millóns, o que evidencia o crecemento dun grupo que, agora, se expande coa compra de Burelarte.
Vista exterior das instalacións de Sargadelos en Sada / Sargadelos
Comentarios
A pesar de que o pasado foi un ano convulso para o histórico grupo cerámico Sargadelos debido ao pulso que o seu actual propietario, Segismundo García, mantivo con Inspección de Traballo e coa Xunta ante os requirimentos feitos para que acometese reformas nas instalacións de Cervo que aumentasen a seguridade laboral, a compañía atópase en fase expansiva. Un feito claro é que acaba de mercar a firma Burelarte para “ampliar e mellorar” a súa capacidade produtiva. Outro indicativo ata agora descoñecido é que a filial comercial do grupo, Porcelana de Sargadelos, rematou o ano pasado cun crecemento de vendas de dobre díxito, superando os nove millóns de euros.
Segundo as contas consultadas por Economía Dixital Galicia a través da base de datos einforma.com, Porcelana de Sargadelos pechou o pasado exercicio con uns activos de 4,3 millóns e un patrimonio neto que se elevou dos 1,39 aos 1,65 millóns. A cifra de negocios incrementouse case un 11%, dos 8,2 aos 9,1 millóns, mentres que o resultado de explotación reduciuse dos 344.000 aos 270.000 euros.
Explican os administradores da compañía no informe de xestión que acompaña o seu balance e memoria anual remitida ao Rexistro Mercantil que durante o pasado ano “mellorouse a xestión de custos e conseguiuse, non sen esforzo, manter un resultado positivo na conta de resultados, tendo afrontado a situación sen aumentar o endebedamento”.
Con un beneficio neto de 254.000 euros, a compañía, indican, presenta “un pasivo corrente a curto prazo que ascende a 2,7 millóns, non existindo pasivos a longo”.
Fábricas
É complicado ter unha radiografía exacta dos números do grupo, xa que non consolida as súas contas. As outras dúas grandes sociedades do conglomerado son Fábrica de Cerámica de Sargadelos, que aglutina a fábrica lucense, e a sociedade Fábrica de Cerámica do Castro, que sostén o negocio industrial de Sada.
Aínda non hai números relativos ao seu exercicio en 2025. O ano precedente, a primeira rematou cunha cifra de negocio de 3,5 millóns e a segunda de 2,43.
