Fíos de Rivera (Estrella Galicia) pacta un aumento salarial de máis do 15% nas fábricas de Agrela e Morás

Heineken España aprobou esta semana unha suba salarial mínima do 10% para os 1.400 traballadores da compañía ata 2028, pero Estrella Galicia superouna. Fíos de Rivera acordou cos sindicatos o novo convenio colectivo, asinado este xoves, que establece unha suba de salarios que superará o 15%. Segundo explicou a CIG, que ten a maioría nas fábricas de Agrela e Morás, o convenio foi avalado pola práctica totalidade dos traballadores da nova planta e polo 91,17% do cadro de persoal da factoría da Coruña, sede do grupo.

O sindicato explica que o aumento do ano 2025 estableceuuse no 5,37%; mentres que nos anos 2026 e 2027 será do 4,5% máis o IPC, co obxectivo de recuperar un 8% de capacidade adquisitiva que, segundo a central, se perdera no anterior convenio. En conxunto, di a CIG, acadaríase un 17% de suba salarial durante o período de vixencia do acordo.

O pacto regula tamén o calendario anual, o sistema de preavisos, a distribución das vacacións, a posibilidade de cambiar de grupo de traballo ou preavisos de traballo que pasarán a cubrirse con persoal voluntario en lugar de ser obrigatorio. Todos estes asuntos pasan a incorporarse ao articulado adquirindo rango normativo, segundo di a CIG nun comunicado.

“A representación da CIG valora moi positivamente todos os avances conseguidos en materia de salarios e conciliación e destaca o abandono da unilateralidade practicada por Estrella Galicia ata o momento para impor os turnos de traballo ou os períodos de vacacións”, asegura o sindicato.